SA KATAPUSAN NAG-ABOT ang adlaw.
Si Simoun, kutob sang aga, walâ makahalín sa iya baláy, nga nalingaw sa paghusay sang iya mga ilulothang kag mga hiyás. Ang iya makahalawhaw nga manggad natakpan na sa daku nga maleta nga asero nga may hapin nga lona. Nabilín ang pilá ka sulodlan nga may unód nga mga pulseras, mga alpiler. sa wala'y duhadoha inogdulot nga ginhulát niya nga himùon. Magataliwan siá sa katapusan kabuylog sa Kapitán Heneral, nga sa maskin anó nga paagi indì maluyag nga pagpadugayon ang iya paggahúm, nga nahadlok sa igahambal sang mga tawo. Ang mga mahinunâhunàon naghambal nga si Simoun indi magpangahás sa pagpabilin nga isá lamang, nga wala na ang iya sumalakdag, indì siá maluyag nga mapahamak siá sa mga pagdumót sang pilá ka tawo nga ginhimuslan kag nahulog sa mga kalaot, labí pa gid nga may kabangdanan siá lungód kay ang Heneral nga mabulós, ginkilala nga isá ka huwaran sa katarong, kag ayhan, basì ipauli sa iya ang kon anó man nga iya nahipo. Ang mga indyo nga matinuohon, sa baylo, nagpalati nga si Simoun isá ka yawà nga indì maluyag mahamulág sa iya mga nahugakom. Ang mga walâ sing paglaum nagpalangiláy nga may halangpon kag naghalambal:
— Lamgod na ang talamnan, makadto sa ibán nga bahin ang apán.
Pilá lamang, diutay kaayo, ang nagyuhóm kag naghipos. Sang hapon, si Simoun nagsugò sa iya sulogùón nga kon magkarâ ang isá ka pamatan-on nga ginhingalanan kay Basilio, pasudlon siá gilayón. Sang ulihe nanirado sa sulod sang iya hulót kag daw nalumós siá sa madalum nga mga pagpainuino. Kutob sang iya pagmasakit, ang nawóng sang manog-alahás
naglabí katig-a kag labí kamasulub-on, labí nga nagdalum ang
