— Sulód! — silíng niya.
Yadto si Basilio, apang quantum mutatus (daw anó ang iya pagliwát)! Kon ang pagliwát nga nahimò kay Simoun sa sulód sang duhá ka bulan daků, sa pamatan-on nga tumoluon makahalawhaw. Ang iya mga pisngi nagyang-ob, ang iya panapót wala na nagkaigò, gumón ang buhok. Nadulà na ang matam-is nga dagway sang kamingaw sa iya mga matá; dirâ nagkilán ang mga dabdab nga masagil-um; saráng masilíng nga napatay siá kag ang iya bangkay nabanhaw nga hinadlukán sang iya nakità sa kinabuhi nga wala'y katubtoban. Kon indi ang krimen, ang iya maitúm nga landong nag-untay sa bug-os niya nga kalawasan. Si Simoun bumatyag sing dakû nga ka tingala kag kaluoy sa kailó nga wala'y palad.
Si Basilio, nga walâ na magyaób, nagpalapit sing mahinay, kag sa tingog nga nagpakurog kay Simoun, nagsilíng:
— Gg. Simoun, nagmalain akó nga anák kag isá ka malain nga utod; nalipatán ko ang pagpatay sang isa ka tawo kag ang mga pagpabatás sa isá ka babác, kag ginsilutan akó sang Dios! Karón walâ sing nabilín sa akon lwás sang akon ka bubut-on sa pagbalos sang malain sing malain, krimen sing krimen, kusóg sing kusóg!
Si Simoun namati sa iya sing mahipos.
—Sang apat ka bulan nga nagligad,— padayon ni Basilio, —naghambal ka sa akon sang imo mga proyekto; namalibad akó sa pagbuylog, kag malain ang akon ginhimò; may katarungan ka. Sang tatlo ka bulan kag tungâ ang ribók buót na gid masugod; walâ man akó magbuylog kag ang hublag walâ madayón. Bayad sang akon ginhimò ginbilanggo akó kag nautang ko ang akon kaluwasan sa imo mga pagpangapin. Ikaw may katarungan kag nagkarí akó sa pagsilíng sa imo: butangi sing hinangiban ang akon mga butkon kag pasugdan ang ribók! Handà akó sa pag-alagad sa imo kabuylog sa tanán nga wala'y palad!
