Ang gal-um nga nagpadulóm sang agtang ni Simoun nadulà gilayón, isá ka silak sang kadalag-an kumilán sa iya mga matá kag nakità niya ang iya ginpangità humambal siá:
— May katarungan akó, huo, may katarungan akó! Ang kinamatarong nagbulig sa akon, ang hustisya yarà sa akon luyó, kay ang akon tilinguhàon kaangay man sang ila sang mga wala'y palad... Salamat, pamatan-on, salamat! Nagkarí ka sa pagtabog sang akon pangduhadoha, sa pagsumpong sang akon mga pag-uloantulò...
Si Simoun tumindog kag ang iya dagway nagsanag: ang kainit nga nagbagáng sa iya, nga sang apat ka bulan nga nagligad, nagpanaysayon siá sang iya mga proyekto kay Basilio sa kagulangan sang iya mga tigulang, nagpakità liwát sa iya nawóng katulad sang mapulá nga tughapón tapos makaligad ang magal-umon nga adlaw.
— Huo,— padayon niya,— ang hublag wala madayón kag binayaan akó sang madamò kay nakità nila akó nga nadulàan sing kabubut-on kag nag-antulò sa katapusan nga tión; may nagpanghawid sa akon tagipusuon, indì akó tag-iya sang akon mga balatyagon kag naghigugma pa akó!... Karón ang tanán napatay na sa akon, kag karón walâ na sing balaan nga bangkay nga ang iya damgo dapat ko tahuron! Karón wala na sing mga pag-uloantulò; ikaw gani, huwaran nga pamatan-on, salampati nga walâ sing dalit, nakahangóp sang kinahanglan, nag-abót sa akon kag nagapasud-o sa akon sa paghulag! Uloulihé na nga nagmuklat ka sang imo mga matá! Ikáw kag akó kuntani nakatingób kag nakahimò sing matahúm nga mga padugì; akó sa ibabaw, sa mataas nga bahin sang katilingban. nga malaghit sang kamatayon sa tungâ sang mga pahamót kag bulawan, sakitón ang mga maduyugon kag himùon nga malain ukón pamunggan ang pilá nga maayo, kag ikaw sa ubós, sa banwa, sa tungâ sang mga pamatan-on, mapaluntad sing kabuhì sa tungâ sang dugô kag mga luhà! Ang aton hilikutón, sa baylo nga magmadugùon kag magmapintas, mangín-langitnon, himpit, makiambungon, kag sa wala'y duhadoha nga ang kadalag-an mangin-puróng sang aton mga paghimud-os! Apang walâ sing nakaisip nga may luyag sa pagbuylog sa akon; kahadlok ukón pagkaagi ang akon nakità sa mga sarì sang ka-
