Kag inuyatan niya sa butkon si Basilio, nga namatì kag walâ man makahangóp sang tanán, dinalá niya siá sa laboratoryo diín nasulód ang iya mga hinimòan sa kímika.
Sa ibabaw sang isá ka latók nakità ang isá ka daků nga kaha nga nabarahusan sing itúm, katulad sa mga sulodlan sang mga bahilya nga pilak nga gindulot sang masigkamanggaranon kag masigkagumalahom. Binuksan iní ni Simoun kag nakità, sa ibabaw sang hapín nga mapulá nga satín, ang isá ka lám para nga may dagway nga wala pa gid mailóg. Ang kalawasán sa dagway sang isá ka granada, daku nga subong sang ulo. sang tawo, may diutay nga gihâ, nga nagpakità sa sulód sang mga binantok nga nahumán, sa mga dagway sang dalagkò nga mga kornalina.1 Ang putós pinulog nga bulawan kag huwád nga himpit patí sang mga kunótkunót sang bungangkahoy.
Ginunot ni Simoun ini nga iya ginhalungan sing maayo, kag kinuha ang inogsindot, naggwâ ang sulód sang talagòán: ang lawas isá ka asero, madamol sanglit duhá ka sentímetro kag sarang makaunód sing kapin pa sa isá ka litro. Nagpamangkutanon sa iya ang panulok ni Basilio: walâ siá sing nahangpan.
Wala na magpanaysayon, kinuhà ni Simoun sing mahalungon sa isá ka kómoda ang isá ka prasko kag tinudlò niya sa pamatan-on ang pórmula nga nasulát sa ibabaw.
— Nitro-gliserina! — kíbot ni Basilio, nga umisol kag pinaiway niya ang iya mga kamót.— Nitro-gliserina! Dinamita!
Kag nagtuo nga nahangpan niya, nagtilindog ang iya mga buhók!
—Huo, nitro-gliserina! — mahinay nga sulit ni Simoun nga nagyuhóm sing mabugnaw kag may kawili nga nagtulok
1 Cornalina-Nagkalainlain nga sari sang mapulang bato nga malahalon.
