dirí sa pag-inúm kabuylog sa akon sang serbesa kag maháw
kitá sa kauswagan sang inyo puód!
Ang mga pamatan-on naghatag sa iya sing pasalamat kag pamalibad nga nagsiling nga walâ silá pag-inúm sing serbesa.
—Nagsayóp kamó, —sabát ni Simoun nga namutikán nga bumatyag sing paghinulsol,—ang serbesa isá ka ilimnon nga maayo, kag nabatián ko nga ginsilíng karón nga aga kay P. Camorra, nga ang kakulang sang kabaskog nga namutikán sa sini nga pungsod nagikan sa madamò nga tubig nga ginainúm sang mga pumoluyò.
Si Isagani, nga daw kaangay man sang manog-alahás sing kathas, pumatiskog sang iya lawas:
— Hanti isiling mo kay P. Camorra,— madagmit nga hinambal ni Basilio, nga sinikól niya sing tagù si Isagani,— isiling mo sa iya, nga kon siá nagainúm sing tubig sa baylo sang alák ukón serbesa, ayhan may dag-on kitá tanán kag walâ sing madamò nga hambalón...
—Kag isilíng mo sa iya, —sugpon ni Isagani, nga walâ magsapák sang pagpanikól sang iya abyan,— nga ang tubig tuman kanamit kag ginainúm, apang makalumós sa alák kag sa serbesa kag makapalong sang kalayo; nga kon mainit manginusbong, nga kon maukay mangin-lawód, kag nga makaisá naglaglag sang katawohan kag nakapatay-og sang kalibutan sa iya mga sadsaran!
Tumangâ si Simoun, kag maskin nga ang iya panulok indi mabasa kay gintabunan sang iya asúl nga tagusilang, sa ibán nga bahin sang iya nawóng saráng makità nga siá nagpaningala.
—Matahúm nga sabát!— silíng niya,— apang ginakatahapan nga nagalahóg siá kag pangkutón akó kon anó ang paghimò sang tubig nga usbong kag kon anó man ang mahimò nga lawód. Si P. Camorra daw indi mapinatihon apang tuman ka lahugán.
—Kon mapainit inâ sang kalayo, kon ang magagming nga mga subâ nga karón makità nga nagalinapta sa mga kalupyakán, itulód sang kabug-at nga matipon sa kaidadalman nga ginakutkot sang mga tawo, —sabát ni Isagani.
