Kag sang makità niya si Basilio nga nagtulok nga ang mga matá nagpamangkutanon kag may pangduhadoha, naghambal
siá:— Karón nga gab-i may pandot kag inâ nga lámpara igabutang sa tungâ sang isá ka diutay nga kiosko nga kalan-an nga sa hungód ginpahimò ko. Ang lámpara magahatag sing masili nga kasanag nga inâ lamang nga isá tuman na nga makapasanag sa tanán; kag, pagligad sang duhá ka pulò ka minuto, ang kasanag magadulom. kag, kon luyag na nila nga pasakàon ang metsa, malupók ang isá ka kápsula sang pulminato² sang merkuryo3 mabusaag ang granada kag sa siní nga kalan-an, sa iya atóp kag salóg may tinagò akó nga mga sinako sang pólbora agúd nga walâ sing isá nga makalwás...
Nagligad ang isa ka tión sang kalinóng: tinulok ni Simoun ang iya aparato kag si Basilio halos makaginhawa.
—Kon amó ang akon bulig indì na kinahanglan, — hambal sang pamatan-on.
— Indi, ikaw may isá ka butáng nga himùon, — sabát ni Simoun nga nanghunâhonà. — Sa ikasiám ang mákina malupók kag ang tunóg mabatián sa mga latid palibot, sa kabukiran, sa mga gikab. Ang hubalg nga akon ginpatingób sa mga artilyero walâ madayón tungód nga walâ sing nagdumala kag indì sa panahon. Sa karón indi magsubong sadto. Sa pagkabatî nila sang lupók, ang mga makaluluoy, ang mga ginalupig, yadto'ng mga nagpalalagyo nga ginhingabót sang kusóg magagulowâ nga may mga hinangiban kag magatilipon sila kay Kabesang Tales sa Santa Mesa sa pagdulhog sa siudad; sa baylo, ang mga militar nga ginpapati ko nga ang Heneral mahiwat sing lahuglahog nga ribók agúd may mga kabangdanan siá sa pagpabilin, magagulowâ sa ila mga kwartel nga handà sa pagluthang bisán kay sin-o nga akon itudlò. Ang banwa nga sa karón, nalisang, kag nagpati nga nag-abót na ang taknà sa pagpamugot, matindog nga handà sa pagpanginmatáy, kag sanglit walâ sing mga hinangiban kag indì pinasakop sa isá ka hubalg, ikaw kag ang ibán pa magpangulo sa ila kag
2 Fulminato — Asín sang ásidong' pulmíniko; ini nga asin makapalupók.
3 Mercurio— Asagi.
