364
mapigaw amó ang matupók agúd indì magpadayon ang nahalitan nga kinabón kag ang tinuga maglakát paisol? Ganì. ipaiway ang inagi nga mga pagpalibóg! Tumanon ang wala'y katubtoban nga mga pagbulot-an, buligan naton silá kag ang dutà labí nga naganunuo kon maabunohan sing dugô, kag ang mga trono labí nga mapag-on kon masimentohán sang mga krimen kag mga bangkay, walâ sing agutilò kag walâ sing duhadoha! Ano ang kasakit sang kamatayon? Ang pagbatyag sa isá ka tión, nga ayhan indi mahangpan, ayhan makaluloyag subong sang pagsaylo halín sa pagpuláw pakadto sa pagtulog... Ano ang malaglag? Isá ka malain, ang pagbatás, mga hilamón nga may balatian agúd itanúm ilis sa ila ang mga lab-as! Tawgon mo inâ nga paglaglag? Inâ iya tawgon ko nga pagtugà, paghimò, pagpatubò, pagbuhì.
Tuman ka dugùón nga mga pulong, nga ginbungát nga may kabakod sang kabubut-on kag may katáwhay, nagpakupos sa pamatan-on, nga ang iya panumdoman nga pinahuyang sang kapin sa tatlo ka bulan nga pagbilanggò kag nadulman sang balatyagon sa pagdumót, walâ sa kahimtangan nga makahangóp sang kadalum sang kahulogán sang mga butáng. Sa baylo nga magsabát nga ang tawo nga labing' malain ukón maitúm sing kalag sa gihapon labí sangsa isá ka tanúm kay may isá ka kalág kag isá ka panumdoman nga, bisán pa ginhimò nga malain kag ginpintasán, saráng pa mabawi; sa baylo nga magsabát nga ang tawo walâ sing katarungan sa paghimulós sang kabuhi sang bisán sin-o sa kaayuhan ni bisán sin-o, kag nga ang kinamatarong sa pangabuhi nagapuyo sa tagsa man ka tawo subong sang kinamatarong sa kahilwayan kag sa kasanag; sa baylo nga magsabát kon balá pagpakalakás sa mga pangulohán ang pagsilot sa may salâ sa iya mga kakulangán ukón krimen. nga silá man ang nagpasud-o sa iya sa paghimò tungod sa pagpatumbayà ukon pagpakalaot, kapin pa gid sa isa ka tawo, dakú siá ukón walâ man sing palad, nga magsilot sa isá ka kailó nga banwa sa mga kasaypanan sang iya mga pangulohán kag mga nagliligad, sa baylo nga magsilíng nga Dios lamang ang makagamit sinâ nga mga kalalangan, nga Dios ang saráng makalaglag kay saráng makatuga, Dios nga yarà sa iya kamót ang pagbalos, ang tubtob sa katub-
