SANG YARA NA siá sa dalan si Basilio nanghunâhonà kon ano ang iya buhaton tubtob mag-abót ang makakulogmat nga taknà; ikapitó pa lamang ang taknà. Panahón yadto sang. mga pagpaliwaliwa kag ang tanan nga tumoluon didto sa ila mga banwa. Si Isagani amó lamang ang indì maluyag magpauli, apang nadulà siá kutob sang amó nga aga kag walâ mahibal-i kon diín siá mag-unáy. Amó iní ang ila ginhambal kay Basilio, nga sang paghalín niya sa bilanggòan nagduaw siá sa iya abyan sa pagpangabáy sa iya nga padayunon siá sa ila. Indì makahibaló si Basilio kon diín siá makadto, walâ sia sing kwarta, walâ siá sing bisán anó lwás lamang sang rebolber. Ang pagpanumdom sang lámpara amó lamang ang yarà sa iya painuino; sa sulód sang duhá ka taknà mahanabò na ang daků nga kalaglagan kag sa pagpanumdom sinâ, gintulok niya nga ang mga tawo nga naglalabáy sa iya mga matá naglalakát nga walâ na sing mga ulo: kag binatyag niya ang kakunyag sang lakás nga kalipay sa pagsilíng nga, gutóm siá kag tanán, sa amó nga gab-i siá ang pagakahadlukán, nga kutob sa pagkaimol nga tumoluon kag sulogùón, ayhan makità siá sa kasanag sang adlaw nga kalahadlukan kag malaot, nga nagtindog sa ibabaw sang hinantal nga mga patáy, nga nagmandò sang mga pagbulot-an sa tanán nga nag-agi sa iya atubangan sa ila matahúm nga mga kotse. Nagkadlaw siá katulad sang isá ka sinubol, kag pinikpik niya ang kulata sang rebolber: ang mga kaha sang bala yarà sa iya mga palhok.
Nag-abót sa iya ang isá ka pamangkutanon: diín masugod
ang ribók? Sa iya kakugmat, walâ siá makaisip sa pagpamangkot kay Simoun, apang si Simoun naghambal sa iya nga magpalayo siá sa dalan Anloague.
