Hanti nagdangat sa iya ang isá ka paghanguphangop; sang amó nga hapon, sang maghalín siá gikan sa bilanggòan nagpadayon siá sa daan nga baláy ni Kpn. Tiago sa pagpangità sang iya diutay nga mga butáng, kag nakita niya ang baliy nga nagliwát kag ginhandà sa isá ka badù; amó yadto ang kasál ni Juanito Pelaez! Si Simoun naghambal sang badù.
Sa sini nga tión nakità niya nga nag-agi sa iya atubangan ang isa ka malawig nga katay sang mga kotse, punô sang mga lalaki kag mga babác nga nagsinugilanon sing masinadyahon; daw nakita niya sa sulód sang mga kotse ang dalagkò nga pinungpong sang mga bulak, apang wala niya pag-iunáy didto ang iya igtalupangod. Ang mga kotse nagpakadto sa dalan del Rosario, kag sang masumalang nila ang mga nagdulhog sa taytay sang España, pilit silá nga magdulog anay kag maglakát sing mahinay. Sa isá nakita niya si Juanito Pelacz sa luyò sang isá ka babác, nga nagpanapót sing putî, nga may belo nga masihág: nakilala niya nga yadto si Paulita Gomez.
- Si Paulita! nakabungát siá sing hinalì nga natingala.
Kag nakita niya nga sa pagkamatuod siá gid, sa panapót sang kalaslon upód kay Juanito Pelaez, nga daw naghalalín sa simbahan.
-Kailó si Isagani! -kibot niya. Anó ayhan ang ginhimò nila sa iya?
Nanghunâhonà siá sing pilá ka tión sa iya abyan, dakû nga kalág, mabinalak-on, kag sa iya hunâhonà namangkot siá kon indi balá maayo nga magpahibaló siá sa iya nahanungód sang bukò, apang sa iya man hunâhonà nagsabát siá nga si Isagani indì gid maluyag magpahilabót sa amó nga dinugò... Kay Isagani walâ nila pagbubata ang katulad sang ginbuhat sa iya.
Sang ulihe naghunâhonà siá nga kon walâ si Isagani mabilanggò, siá amó ang nanginnobyo ukón bana na sa amó nga mga taknà, may título sa Pagkamanogbulong, nga nagapangabuhi kag nagapamulóng sa isá ka bahin sang iya puod. Ang landong ni Julí, nga nadugmok sang iya pagkahulog, lumabáy sa iya panumdoman; ang masagil-um nga mga dabdab sang kaaligutgot nagpahingalayo sang iya mga kalimutáw, kag hinikaphikap niya liwát ang kulata sang rebolber nga binatyag niya
