Gin-isip-isip niya nga ang dalan Anloague amó ang pagasugdan sang ribók, didto pumaamulya ang pamatan-on, nagdagundagon síá kag nag-una sa mga kotse. Sa katapusan, ang tanán nagpadulong sa daan nga balay ni Kpa. Tiago: didto nagtilipon silá sa salaután sa pagsaot sa walâ sing atóp! Si Basilio nagkadlaw sang makità niya ang nagtinagduhá nga mga Beteranong' Gwardya nga nagbantay. Tungód sang ila kadamùón sarang mabinagbinag ang kadakô sang badù kag ang kadamò sang mga pinangagda. Ang mga tawo nag-alawas sa baláy, nagbaha ang nagsaganá nga kasanag sa mga bintanà; ang atangan naalpombrahán kag napun-an sing mga bulak; didto sa ibabaw, ayhan sa iya daan kag mamingaw nga hulót, naglanton karón ang orkesta sing mga lalantunon nga masadya, nga walâ makalumós sing bug-os sang nagsinamò nga kagahod sang kinadlaw, binaisbais kag mga tinalangkaw.
Si don Timoteo Pelaez nakalambot sa putókputokán sang manggad, kag ang kamatuoran lumampas sa iya mga damgo. Pinakasál niya, sa katapusan, ang iya anák sa isa ka manggaranon kaayo nga manunoblì sang mga Gomez, kag salamat sa pilak nga ginpahulám sa iya ni Simoun, ginpasangkapan niya sing hinarianon ang amó nga daku nga baláy, nga gintabà sa katunga sang iya bili, nakahiwat dirâ sing isá ka buganà nga badu, kag ang labing lutáw nga kabalaanan sang Olimpong' manilan-on amó ang iya nangin-pinangdapit, sa pagpulog sa iya sang silak nga bulawanon sang ila kadungganan. Nadumdo mán niya kutob sang amó nga aga, tungód sa dalayon nga paglanton sang isá ka lapnag nga ambahanon, ang pilá ka madu-
