This page has been validated.
372
hanhanan, sa isá ka madayaw nga kiyosko, nga hungód hinimò sa amó nga hitabô. Ang pinalambatlambat nga kahoy nga
pinulog sa bulawan, diín nagkamang ang mahamót nga mga balagon, nagtagò sang sulód sa mga matá sang mga timawà, nga walâ man magpugóng sang pagsulód sang lab-as nga hangin, agúd mapaunay ang kabugnaw nga kinahanglanon sa amó nga duóg. Isá ka pinatàas nga tulungtongan nagduhol sang latók sa ibabaw sang kataasón sang ibán nga mga latók diín makaon ang kubós nga mga tinuga, kag may isá ka arko, nga ginpunihán sang labing' maayo nga mga mandudoág, magalipón sang dalagangan nga mga bagúl sa mahisàón nga mga panulok sang mga bituon.
Didto may pitó lamang ka kubyertos; ang bahilya bus-og nga pilak, ang mantel kag mga serbilyeta lunsay mapino kaayo nga linen, may mga alák, ang labing' malahalon kag labing' makaluloyag. Pinangità ni D. Timoteo ang labing' pinasahî kag labing' malahalon kag indì siá magpangduhadoha sa paghimò sing krimen, kon ginsingganán lamang siá nga luyag sang Kapitán Heneral ang magkaon sang unód sang tawo.
