—Sanday Psiquis kag Kupido nagpakità sa Olimpo!— hunahônà ni Ben Zayb kag natihab ang paanggid anggid sa iya panumdoman nga ipagwâ niya sa tión nga kinahanglanon. Ang nobyo, sa pagkamatuod, may nawóng sang pagkasutíl sang diwa sang gugma, kag sa diutay nga maayo nga kabubut-on sarang mabilang nga alhaba1 ang buklod sa iya likód kon labí nga magtaas, nga ang kadamol sang iya prak indi makatago.
Si don Timoteo nagsugod sa pagbatyag sang kasakit sang iya hawak; ang mga kalyo sa iya mga tiíl nag-amát sakit, ang iya liog bumatyag sing kakapoy kag wala pa ang Kpn. Heneral! Ang dalagkò nga mga diyosdiyos, nga sa ila nalakíp sanday P. Irene kag P. Salví, nakaabót na, matuod, apang wala pa ang daků nga daguob. Naghiwaos siá, ginkibáng, ang iya tagipusùon nagkubákobá sing mabaskog, may luyag siá sa pagpaiway sang isá ka kinahanglanon, apang kinahanglan anay nga magyaób siá, magyuhóm, kag sang ulihe naggwâ siá kag indì man makahimò, nagpungkò, nagtindog, walâ siá makabatî sang ginhambal nila sa iya, walâ man maghambal sang nag-abót sa iya hunâhonà. Sa sini nga tión, isá ka diyosdiyos nga maluyagón nakahambal sa iya nahanungód sang iya mga kromo.² nga iya ginpakalaw-ay nga nagpasalig sa iya nga makabulíng sang iya mga dingding.
— Makabuling sa mga dingding!— sulit ni D. Timoteo nga nagyuhóm nga may luyag sa pagkugâ sa iya. — Apang hinimò inâ sa Europa kag amó ang labing' mahál nga makuhà ko sa Manila! Makabulíng sa mga dingding!
Kag si D. Timoteo naghumót sa pagsukót sa masunod nga adlaw sang tanan nga bale sang manogsaway sa iya almasin. Nabatián ang mga pamito, hiríhirí sang mga kabayo, sa katapusan!
—Ang Heneral! —Ang Kapitán Heneral!
Nangluspad sa kakunyag, tumindog si D. Timoteo nga hinilúm ang kasakit sang iya mga kalyo, kag gin-updan sang
______________
1 Aljaba—Sulodlan sang mga pana nga malabalaba, manipulon kag bukás ang baba.
2 Cromos—Ang mga dinuagán sa metal nga kromo.
