—Nagaduaw man siá kay Kapitán Tiago?
—Kutob sang nahauná nga adlaw sang iya pag-abót, kag sa pagkamatuod nga inang' isá nagabilang sa iya nga kasumpong...sa palanublion... kag nagasalig akó nga mapakigkita siá sa Heneral nahanungód sa pagtudlò sang kinatsila.
Sa amó nga tión nagsampot ang isá ka sulogùón sa pagsilíng kay Isagani nga ginpatawág siá sang iya tiyù.
Sa isá sang mga bangkù sa popa nga nagsimpon sa ibán nga mga sumalakay may naglingkod didto nga isá ka parì nga nagtan-aw sa takas sang mga butang sa kinaugali nga naglalabáy sa iya panulok. Ang iya mga kaingod naghatag sa iya sing maayo nga duóg; ang mga tawo, kon mag-alagi malapit sa iya, nagtulokás sang ila mga kalù, kag ang mga nagsulogál walâ magpangahás sa pagbutáng sang ila latók nga halampangan malapit sa duóg nga iya ginpungkòán... Ang amó nga parì talagsa lamang naghambal, walâ pagtabakô kag walâ paggamit sing mga gawì nga may bugál, walâ paglikáw sa pagsimpon sa ibán nga mga tawo kag may kahamuot nga nagbalos sa mga pagyaób sa iya, nga daw ginbatyag niya nga ginpadunggan siá kag ginkilala sing maayo. Gulang na sia kaayo, ang iya mga buhók halos na bukáy, apang ang iya panglawasón daw mabakod pa kag, bisán nga naglingkod, tadlong ang iya lawas kag ang iya ulo tadlong man, apang walâ sing bugál kag pagkamatinaàstàason. Tuhay siá sangsa ibán nga mga pari nga indyo, malakâ sa ibán, nga sa amó nga panahón nag alagád bilang mga koadhutor ukón nagdumala sing makadali lamang sang pilá ka kurato,8 nga may tuman nga paghalong kag pagpaubós nga may pagbatyag sang iya kaugalingon nga dungóg kag sang pagkabalàan sang iya katungdanan. Ang diutay nga pag-usisà sang iya bayhon, kon indi na nahanungod sa iya bukáy nga buhók, makilala gilayón nga siá natuon sa isá ka panahón, sa isá ka gubán sang kaliwatan, sang ang maayo nga mga pamatan-on walâ nagkahadlok sa pagpakilala sang ila pagkatalahàon nga ginhimò silá nga mga pari, sang ang mga pari nga tumandok nagtulok nga kaangay nila lamang ang maskin sin-o nga mga prayle, kag ang sari sang kabikahan, walâ pa ginpakakubós kag.
_________________
8 Curato-Isa ka diutay nga parokya nga nahamtang sa idalum sang gahúm sang isá ka daku nga parokya.
