SA GILAYON sang masayran niya ang hitabô sang madalá nila ang mga sugâ kag nakita niya ang walâ na pagkalaigò nga mga kahimtangan sang mga diyosdiyos nga ginkibáng, si Ben Zayb, nga punô sing kaakig kag may pahanugot na nga daan sang tagpanusi sa pamantalà, nagdalagan pauli sa iya puloy-an -isá ka silong diín nagpuyô siá kaupod sang ibán - sa pagsulát sang artikulo nga labing' bilidhon nga wala pa mabasahí sa silong sang langit sang Filipinas: ang Kapitán Heneral malakát nga masulub-on kon indì anay makasayod sang iya lakás nga mga pagdayaw, kag sinâ, si Ben Zayb nga may maayo nga tagipusuon, indì makapahanugot. Gani nga pumaiway siá sa pagpanihapon kag sa pagsaot kag walâ siá magtulog sang amó nga gab-i.
Dulongan nga mga pagtuáw sa kakugmat, sa kaakig, manganinaw nga ang kalibutan nag-usmod kag ang mga bituon, ang wala'y katubtoban nga mga bituon, nagsinunggòanay! Madasón ang makatilingala nga pagpakilala, nga punô sing mga pagpahanungód, mga paghilipos..., sa ulihe ang kasaysayan sang nahanabò kag ang katapusan nga panugiron. Gindamò niya ang mga pasibudsibod, sinigpot niya ang mga pagpatam-istam-is sang mga halambalanon sa pagsaysay sang paghuy hoy sang mga abaga kag ang ulihe nga bunyag sang salsa nga nabaton sang Iya Taslangdon sa iya agtang nga mataas; gindayaw niya ang iya pagpanigaon nga iya nabawi ang pagpungkò nga tadlong, nga ginbutáng niya ang iya ulo diín anay ang iya mga batiis kag baliskad siní; nag-amba siá sing isá ka ambahanon sa Makagagahum tungód sa Iya pagbantay sing maayo sang amó ka balaan nga mga tul-an kag ang bahin sang sinulát nahimò nga tuman ka halalungan, nga ang I. T. ginpakilala nga daw isá ka tigbatás1 kag nahulog nga tuman
_____________________
1 Tigbatás - Héroe kon sa Kinatsila.
