Nahanabò nga ang mga talandàan nagkaangay sa iya ni Simoun, ang ila panaysayon ginbaton nga binuang kag ginhatagan nila ang buyóng sang tanan nga sari sang kasakitán, lakip ang sa makinang' elektrika, tungod sang amó nga kabutigán. Labot pa, ang balità sa pagkadulà sang manog-alahás nakatawág sang igtalupangod sang bug-os nga Escolta, kag nakita ang mga sinako sang pólbora kag madamò nga mga bala sa iya balay, ang panugiron may hagyon sang kamatuoran kag ang katingala nagsugod likop sa hitabo, nga naputós sang mga pangduhadoha, ginhambal nga ginhutík, may ubóubó, sa panulok nga maduhaduhaon, mga tinagâ nga halangpon, kag sa tagsa ka tinipuntipon madamò ang nabatián nga wala'y kasamputanan nga hinambalhambal. Yadto ng mga nakasayod indi makapaiway sang ila kahadlok, naglalabà ang ila mga nawóng, nagpalangluspad kag diutay lang sila makuhàan sing tadlong nga isip sang masapwan nila ang pilá ka butáng nga nagkahanabò nga walâ masayri.
— Sa maayo nalwás kitá! Sin-o ang makasilíng...
Sang hapon, si Ben Zayb, nga ang iya mga palhok napunô sing mga rebolber kag mga bala, nagduaw kay don Custodio, nga iya nakità nga madulop naghikot sang isá ka proyekto batok sa mga manog-alahás nga amerikanhon. Naghutík siá sa dulonggan sang mamantalà, sa tingog nga tuman kahumok kag sa sulod sang iya duhá ka palad, sing mga tinagâ nga tagù.
—Matuod? —pangkot ni Ben Zayb nga sinuksok niya ang iya mga kamót sa iya duhá ka palhok, samtang maathag nga nangluspad siá.
—Kag diín nila siá makità...
Tinapos niya ang hambal nga naghagyò sing halangpon. Binatak niya ang duha niya ka butkon sa luyó sang iya nawóng, ang tuó malapit sang sa walá, pinakulób niya ang iya mga palad, kinipot ang pihák nga matá kag nagtikáng sing duhá paatubang...
—Psst, psst! Panihól niya.
—Kag ang mga brilyante? pangkot ni Ben Zayb.
—Huo kon makità nila siá...
Kag naghagyò siá liwát sang iya mga tudlò sa kamót nga tuó. nga pinalisò niya gikan sa atubangan palikód kag gikan sa
