—Apang...apang... —Pumitlà si Momoy nga nagpalangurog.
—Nakú! —hambal ni Sensia nga nagtulok sa iya nobyo kag nagpalangurog man sa nagkahanabò sa badù.— Ini nga ulitawo... kon abi naglupók...
Kag tinulok niya ang iya nobyo nga may kaawà kag nagdayaw sang iya kaisog.
—Kon abi naglupók...
—Walâ sing nabilin nga buhi sa bug-os nga dalan sang Anloague!— sugpon ni Kapitan Toringoy nga nagpakità sing kaisog kag walâ sing kakibáng sa mga mata sang iya panimaláy.
- Naghalín ako nga nalisang, padayon ni Chichoy,— nga nanghunâhonà nga kon abi may isá lamang ka kiráb, isá ka sigarilyo, nga nahulog ukón abi naulà ang isá ka lámpara, sa karón nga tión walâ na kitá sing Heneral, bisán Arsobispo, walâ sing tanán, bisán mga alagád lamang! Ang tanan nga yadto didto sa badù kagab-i, nagkaladugmok!
— Birhen Santísma! Iní nga ulitawo...
—Susmariosep! --nakatikáb si Kapitana Loleng. - Ang tanán nga nakautang sa amon yadto didto; susmariosep! malapít didto may isá kamí ka baláy nga palahinakayán! Sin-o ayhan ang...
— Karón mahibal-an ninyo,— sugpon ni Chichoy sa mahinay nga tingog. —Apang kinahanglan nga hipsan ang likúm. Karón nga hapon nasumalang ko ang isá nakon ka abyan, nga eskribyente sa isá ka talatapán kag nahanungód sa nahanabò, naghatag sa akon sang panuytoy: nahibal-an ina sang pilá ka alagád... Sin-o abi sa inyo pagpati ang nagbutang sang mga sinako nga pólbora?
Madamò ang nagpakinhol lamang sang ila mga abaga; si Kapitan Toringoy lamang ang nagpasiplat kay Isagani.
Ang mga prayle?
—Si Insik Quiroga?
— Isá ka tumoluon?
— Si Makaraig?
Si Kapitan Toringoy nag-ubó kag tumulok kay Isagani.
