on, ang kabuhì binatyag niya nga makatalaka kag indì mas-a
mapadayon. Kon indì lang nahanungód sa kinaiya kag sa
pagtahâ sa iya palangkòan, ang amó nga wala'y palad nga
gugma amo kuntani ang naglwás sa iya sa tigalbong diín
nahulog ang mga pari nga regular10 kag seg'ar11 sa Filipinas.
Nagtatap siá sang iya mga tulumanón sa simbahan bilang katungdanan, kag sa iya tutùo nga naduyogan sa mga kina-
alam sa kinaugalì.
Sang pag-abót sang mga hitabo sang "72,12 ginkahadlukán ni P. Florentino nga ang iya kurato tungód sang dalagkò nga kaayuhan nga iya nahimò mag-agda sang igtalupangod nahanungod sa iya, kag mahidaiton sa ibabaw ibabaw sang tanán pinangayò niya ang iya paghalín, nga nagpangabuhî sang ulihe bilang isá ka timawà sa kadutàan sang iya panimaláy, nga nahamtang sa mga baybayon sang Pacífico. Didto gin-ayóp niya ang isá niya ka hinablos, nga si Isagani, sunô sa mga mabinutangbutangon, anák kunó niya sa iya anay kahagugma sang mabalo siá, apang tunay nga anák sang iya pakaisá nga babae sa Manila sunô sa mga matarong kag nakasayod.
Ang Kapitán sang bapor nakatalupangod sa parì kag inagda niya nga magsulód sa kámara kag magsakà sa ibabaw nga kubyerta. Sa pagpilit sa iya ginsugponán niya:
-Kon indi ka magsakà, ang mga prayle magapati nga indi ka maluyag magpakigbuylog sa ila.
Si P. Florentino walâ na sing liwan nga mahimò kundi ang magbaton kag pinatawag niya ang iya hinablos sa pagsugid sa iya sang nagkahanabò kag nagsilíng sa iya nga indì magpalapit sa amó nga kámara samtang nga didto siá.
-Kon makità ka sang Kapitan, agdahón ka niya kag panghimuslan naton ang iya kaalwan.
-Mga ugali sang akon tiyù! -Hunâhonà ni Isagani. Ginahimò iní agúd walâ sia sing kabangdanan nga makapakighambal kay Da. Victorina.
_________________
10 Regular - Isa ka pari sa pagbilang nga manubo sa simbahan nga Katóliko.
11 Seglar- Isa ka pari sa simbahan nga Katoliko nga wala masakop sang mga pagsulondan nga monástiko.
12.... mga hitabo sang '72 - Ang nahanabo sa Cavite sang tuig 1872 mga ginbitay sanday mga pari Burgos, Gomez kag Zamora.
