—Luthangá silá!
Ang mga bilanggò nagluluhód, nga punô sang kalisang. Sanglit indi nila mabatak ang ila mga kamót, na silá nga naghalalók sa balás ukón gindukô nila ang ila mga ulo: May naghambal nahanungód sang iya mga anák, nahanungód sang iya ilóy nga nabilín nga walâ sing masagód; ang isá nagtug-an nga mahatag sing kwarta, ang isá nanawag sa Dios, apang ang mga kanyon sang mga púsil napatumod na sa ila kag ang isa ka makalilisang nga linupok ang pumahipos sa ila nga tanán.
Hantì sinugdan nila ang pagluthang sa mga tawo nga yadto sa hitaas, nga amát-amát ginpurongán sing mga asó. Kon diri binagbinagon kag sa kalawigón sang pagluthang, ang mga kaaway nga. nagpalalipód, saráng maisip nga may mga pusíl nga indi magkapín sa tatlo. Ang mga gwardya nag-amát-amát takas kag dayon ang ila pagluthang, nagpalalipód silá sa mga punò sang mga kahoy, naghalapâ kag ginhimulatan nila ang paglambot sa hitaas. Naglulompat ang binilog nga mga bató, pinang-utód ang mga sangá sang mga kahoy, sinampawsampaw ang pinikáspikás nga dutà. Ang nabauná nga gwardya nga nangahás sa pagkamang, lumup-og kag lumigid nga napilas. sang bala sa abaga.
Ang nagpalalipód nga mga kaaway yarà sing ila sa maayo nga kahimtangan; ang maisog nga mga gwardya nga indì makahibaló magpalagyo, daw buót na nga mag-isol, kay nagdululog kag indi na maluyag magpadulong. Yadto nga inaway batok sa mga indi na makità nagpakurog sa ila. Walâ silá sing nakità kundì asó lamang kag mga bató; walâ sing mabatìán nga tingog sang tawo, walâ sing isá ka landong: sarang masilíng nga nagpakigsumpong sila sa bukid.
— Abí, Carolino! Diín na yadto'ng imo katandà, p! singgit sang kabo.
Sa amó nga tión isá ka tawo gumwâ sa ibabaw sang bato nga naghagyò sang iya pusíl.
—Luthangá inâ! singgit sang kabo nga dungan niya ginpasipalahan.
Tatlo ka gwardya ang nagtuman, apang ang tawo nagpadayon sa pagtindog; naghambal nga nagsinggit apang walâ mahangpi.
