Ang Carolino nagdulog, nga daw nakilala niya ang amó nga landong nga gindigos sang kasili sang adlaw. Apang ang kabo nagpahog sa iya nga baklirón siá kon indi síá magluthang. Tinumod sang Carolino ang iya pusíl kag nabatián ang isá ka lupók. Ang tawo sa bató tumiyog sa iya kaugalingon kag nadulà nga suminggit nga nagpalibóg sang ulo sang Carolino.
Isá ka hublag ang ginhimò sa luok nga daw ang mga nagpalalipód naglinapta sa maskin diín nga padulongan. Hanti ang mga soldado nagsugod sa pagpadulong, nga hilway sa tanán nga panumpong. Isá ka tawo naggwâ sa hitaas nga nagsayaw sang iya bangkaw; ang mga soldado naglulothang, kag ang tawo nag-uy-oy sing amát-amát, nagkapyot sa isá ka sangá; isá pa ka luthang, kag nahulog siá nga nagkulób sa ibabaw sang bató.
Ang mga gwardya nagkalamang nga may pagpanigàon, nga nagsuksok sang ila mga bayoneta, nga handà sa pagpakigaway sa lawas kag lawas; ang Carolino amó lamang ang isá nga naglakát nga nag-uloantulò, nga ang panulok naglisá, masulub-on nga nagpanumdom sa singgit sang tawo sang iya pagkahulog nga naigò sang iya bala. Ang nahauná nga nakasampong sa hitaas nakakità sang isá ka tigulang nga naghimumugtò, nga nag-untay sa ibabaw sang bató; tinuslok niya sing bayoneta sa lawas, apang ang tigulang walâ magkibô: nagtulok siá sing tumod sa Carolino, isá ka panulok nga indi mahangpan kag sa iya daw tul-an nga kamót nagtudlò sang isá ka butáng sa likód sang mga bató.
Ang mga soldado nagbalalik kag nakità nila ang Carolino nga nangluspad sa kakugmat, ang bàbà nagngangá kag may panulok diín naglutáw ang katapusan nga tulo sang katarungán. Ang Carolino nga indi liwan kundi si Tanò, ang anák ni Kabesang Tales nga nakabalik halín sa Carolinas, nakilalà niya nga ang naghimumugto nga tigulang, amo si lolo niya Selo, nga, tungod kay indi niya siá mahambal, gin-asoy niya sa iya tagumatayon nga mga matá ang isá ka binalaybay sang kasakitan. Kag bangkay na, padayon gihapon nga nagtudlò siá sa likod sang mga bató...
