mag-abót sa pagdakóp kay Simoun? Ang kahimtangan sang
masakitón indi makapahanugot sang paghulag labí na gid ang
isá ka malawig nga pagpanglakaton... Apang ang telegrama.
nagsiling buhî ukón patáy...
Si P. Florentino umontat sa paglanton kag pumalapit sa bintanà sa paglantaw sa dagat. Ang hublas nga kadaygan, nga walâ sing bisán isá ka sakayán, walâ sing isá ka layag, walâ sing nasugid sa iya. Ang diutay nga pulô nga makilala sa malayò, isá lamang, amó lamang ang naghambal sa iya sa iya pag-isahanon kag nahimò nga labí pa kamingaw ang taliwalà. Ang wala'y katubtoban nga taliwalà makahalanusbò nga tuman pa gid kahipos.
Gintinguhàán sang tigulang ang paghanguphangop sang yuhóm nga masulub-on kag may pagtamay ni Simoun sang mabaton niya ang balità nga bilangguón siá. Ano ang kahulogán sang amó nga yuhóm? Kag ang isá pa gid ka yuhóm, nga labi ka masulub-on kag labí pa gid nga may pagtamay, sang masayran niya nga maabót siá nga isá lamang sa ikawaló ang taknà sa gab-i? Ngaa man nga nangindi si Simoun sa pagpanagò?
Nagdangat sa panumdoman sang pari ang bantog nga hurubaton ni San Juan Crisóstomo nga nag-apin sang agî nga si Eutropio: "Walâ sing kahigayunan sadto subong karón ang paghambal sing: Ang bugál sang mga bugál nga lunsay binugál!"
Huo, yadto si Simoun nga tuman ka manggaranon, tuman ka gamhanan, ginkahadlukán sing tuman sang isá lang ka semana nga nagligad, karón, labí nga nadulàan sing palad sangsa kay Eutropio, nangità sing dalangpan, kag indì sa mga altar sang isá ka simbahan, kundi sa isá ka makaluluoy nga baláy sang isa ka parì nga indyo, sa tungâ sang kagulangan, sa naligwin nga baybayon sang dagat! Bugál sang mga bugál kag lunsay binugál! Kag yadto nga tawo, sa sulód sang malip-ot nga mga tinaknà, mahimò nga bilanggò, lalasón sa kama diín siá nagahigdà, nga indì pagtahàón ang iya kahimtangan, indi pagtalupangdon ang iya mga pilás, buhi ukón patáy ginpangayò siá sang iya mga kaaway! Anó ang paglwás sa iya? Diín pangitàon ang mga tinagâ nga makalugpay sang Obispo sa Constantinopla? Ano ang gahúm sang iya kubós nga mga tinagâ mga tinagâ sang isá ka pari nga indyo, nga ang pag-
