pakahuyâ sa iya kag pagkadulà sang pagsalig sa iya inâ man
gani si Simoun sadto'ng mga adlaw sang iya kahimayaan ang
daw namalakpak kag nagpasud-o?
Si P. Florentino walâ na makadumdom sang ginhimò sang manog-alahás sa iya sang duhá ka bulan nga nagligad nga walâ niya siá pagsapaká, sang pangabayón niya ang iya bulig sa kay Isagani, nga ginbilanggo nagikan sa hinali nga pagsibwà sang iya balatyagon; nalipát siá sang mga paghikot nga ginpakita ni Simoun sa pagpatigayon sang kasal ni Paulita, kasál nga naghatag kay Isagani sing lakás nga kaakig sa isigkatawo, nga nakatublag sa iya tiyù: iní tanán nalimtan na ni P. Florentino kag nadumdomán niya lamang ang kahimtangan sang pilasón, ang iya mga katungdanan bilang bumalaton, kag nagpalapyò sang iya utok. Dapat niya siá tagùon sa paglikáw sang mabimò sang pagbulot-an? Apang siá na gid nga taglawas walâ pagsakò: nagyuhóm...
Sa siní nanumdom ang maayo nga tigulang sang ang isá ka sulugùón nag-abót sa pagpahibaló sa iya nga ang pilasón maluyag sa iya magpakighambal. Kumadto siá gilayón sa masunod nga hulót, isá ka matinlò kag napasudlan maayo sing hangin nga hulót, nga ang salóg malagpad nga mga tapi nga nagkintab kag mahining, nga may dalagkò kag mabug-at nga mga silyon, sa dagway nga sinadto, nga walâ sing barnis kagi mga dibuho. Sa isá ka higád may isá ka daku nga kama nga kamagóng nga may apat ka haligi nga talakdan sang moskitero kag, sa luyó, may isá ka latók nga punô sing mga botelya, mga linen kag mga bendahe. Isá ka lulodhan sa tiilán sang isá ka Cristo kag isá ka diutay nga librerya sarang mamutikán nga hulót iní sang parì, nga ginhatag sa iya dumulòaw, sunô sa ugali nga pilipinhon nga ihatag sa dumulòaw ang labing' maayo nga pagkaon, ang labing' maayo nga hulót kag ang labing" maayo nga hiligdàan sa balay. Kon makità ang mga bintanà nga bug-os nabuksan sa pagpasulód sing hilway sang putlì nga hangin gikan sa dagat kag sang iya wala'y katapusan nga panaghuyon, walâ sa Filipinas sing makasilíng nga didto may isá ka masakitón, kay batasan ang pagtakóp sang sang tanan nga bintanà kag sang labing' diutay nga mga gihâ sa gilayón kon may isá nga kataruhon ukón magbatyag sing maskin anó nga diutay nga hilanat.
