Ang pari nga nalisang, lumuhód sa lulodhan, nangadî sa tiilán ni Cristo, nga linubóng niya ang iya guyá sa iya mga kamót kag sang ulihe tumindog nga maligdong kag mabug-at ang nawóng nga daw nakabaton siá sa iya Dios sang tanán nga kabaskog, sang tanán nga kadungganan, tanán nga kagamhanan gikan sa Hukóm sang mga ipalatugsiling. Inidóg niya ang isá ka silyon sa ulohán sang masakitón, nga handà sa pagpamati.
Sa nahauná nga mga tinagâ nga hinutík sa iya ni Simoun, sang isugid niya sa iya ang iya matuod nga ngalan, ang tigulang nga pari nakapanikad paisol kag tinulok niya siá nga may kahadlok. Ang masakitón nagyuhóm sing may kapaít. Kinibáng siá, ang tawo bumatyag nga indì siá tag-iya sang iya kaugalingon, apang sa gilayón naulián siá, kag tinabunan niya. ang iya nawong sing panyù, humiláy siá ulî sa pagpamatì.
Sinugid ni Simoun ang iya mapaít nga maragtas nga sang napulò kag tatlo ka tuig nga nagligad nagbalik gikan sa Europa, punô sing mga pagsalig kag nagyuhóm nga mga handum, nagabót sia sa pagpakasál sa isá ka pamatan-on nga babae nga iya nahagugmaán nga handà sa paghimò sang maayo kag sa pagpatawad sa tanan nga nakahimò sa iya sing malain, lamang nga pabay-an siá nga magpuyo sing malinóng. Indì amó iní ang nahanabò. Isá ka likúm nga kamót ang tumulod sa iya sa buhawi sang paghingabót nga ginpaliso sang iya mga kaaway; ngalan, manggad, paghigugma, palaabuton, kahilwayan, ang tanán iya nadulà kag nakalwás lamang siá sa kamatayon salamat sa bulig sang isá ka abyan. Hanti nagsumpà siá sa pagtimalos. Sa mga manggad sang iya panimaláy, nga nalubóng sa isá ka kagulangan, nalagyo siá nga nagkadto sa ibán nga pungsod kag nagduyog sa pagpatikang, nagbuylog siá sa inaway sa Cuba, nga nagbulig sa isá ka bahin kag sa isá man ka bahin apang dalayon siá nga madalag-on. Didto nakilala niya ang Heneral, nga sadto komandante nga ang iya kabubut-on iya nabihag nahauná sa mga pagpahulám sing kwarta. kag sang ulihe nag-abyanay silá salamat sa iya krimen nga ang mga likúm siní nahibal-an sang manog-alahás. Siá, sa gahúm sang iya pilak natigayon niya ang iya destino, kag sang yari na siá sa Filipinas, nag-alagád siá sa iya nga bilang bulág nga manogtuman kag ginpasud-o niya sa paghimò ang tanan nga
