- Ich weiss nicht was soli
- es bedeuten Dass ich so
- traurig bin!
SANG MAKAHATAG SI P. FLORENTINO sing katahurán sa diutay nga katilingban walâ na maghari ang malain nga buót sang nagligad nga mga binaisbais. Ayhan nakalugpay sa mga balatyagon ang malipayon nga mga balay sa banwa sang Pasig, ang mga kopita sang heres nga ila nainúm sa pagpangaman ukón ayhan ang pag-abót sang isá ka maayo nga pamahaw; mangin isá ukón ibán nga butáng, apang ang matùod nga nagkinadlaw kag naglinahugay silá lakip ang maniwang nga pransiskano, bisán nga walâ maggahod kaayo: ang iya mga yuhóm daw ngirit sang nagatagumatayon.
— Malain nga mga panahón, malain nga mga panahón! — silíng ni P. Sibyla nga nagkadlaw.
— ¡A, ayaw ka pagsilíng sinâ, Bise-Rektor! —sabát ni kanónigo Irene nga dinusô niya ang siya nga ginapungkòán sang isá. — Sa Hong Kong may maayo kamó nga mga palatikangan kag nagapatindog sing tagsa ka baláy nga... A!...
— ¡Tuman na, tuman na! -sabát niya, —kamó walâ makasayod sang amon mga kahinguyangan, kag ang mga manoghinakay sang amon mga asyenda nagsugod sa pagkulumod...
— ¡A tuman na sa mga pagkumod, nga yawà, kay karón mahibi akó! —may kasadya nga binungát ni P. Camorra. — Kami walâ pagkulumod kag wala kamí sing mga asyenda bisán mga bangko. Kag talupangdan ninyo nga ang akon mga indyo nagasugod sa pagpangindi sa mga buhís kag gina-
