Simoun. Nagdulog siá anay sing pilá ka tión: sa gilayón, nakaisip sing pat-od, nanaog nga dalá niya sa hagdanan, kumadto
sa bató diín si Isagani masunson nagpungkò sa pagsusi sa
kaidadalman sang dagat.
Si P. Florentino nagtan-aw sa iya tiilán. Didto sa idalum nakità niya ang lagtum nga mga balód sang Pacífico nga nagdapya sa mga buhôbuho sang bató nga naghimò sing sagunson nga mga linagumba, subong man nga, ginlapós sang silak sang bulan, ang mga balód kag mga bukál nag-ilinggat-inggat subong sang mga kiráb sang kalayo, nga daw hinakúphakóp nga mga brilyante nga ginsabwag sa hangin sang isá ka gadyà sa kaidadalman sang dagat. Tumulok siá palibot sa iya. Isá lamang siá: Ang mamingaw nga baybayon nadulà sa malayô sa masagil-um nga alipuop, nga ginpanas sang bulan tubtob nga sumimpon sa gindut-an. Ang kagulangan nagkulomuron sa tingog nga indi mahangpan. Hanti ang tigulang, sa masarangán sang iya makusog nga mga butkon, hinabóy niya ang maleta sa taliwalà nga tumopâ sa dagat. Nakatiyog siá sa iya kaugalingon sing makapilà, kag nanaog siá sing madasig nga gin-usoy niya ang diutay nga likòan, diín nag-umpok sa iya mahining nga kadaygan ang maluspi nga mga silak. Nakità sang tigulang nga tumalbo ang tubig, nabatián niya ang madali nga lagsak, kag ang kaidadalman kumipot nga linamon niya ang mga alahas. Naghulát siá sing pilá ka tión sa pagtan-aw kon ang kaidadalman may diutay nga ibalik, apang ang balód bumalik sa iya kahimtangan nga may tuman nga likúm subong sang una, nga walâ magdugang sing bisán isá ka aníb sa iya naghanol nga kadaygan, subong abi nga sa kalaparón sang dagat may nahulog lamang nga isá ka diutay nga bató.
— Pagbantayán ka sang kinaugali sa mga kaidadalman, sa tungâ sang mga bató nga daw bulak kag mga mutyà sang iya wala'y katapusan nga kadagatan! —hambal sang ulihe sang parì nga inuntay niya sing maligdong ang iya kamót. Kon sa isá ka katuyoán nga balaan kag langitnon kinahanglanón ka sang mga tawo. ang Dios makahibaló magkuhà sa imo sa dughan sang mga balód... Sa karón, dirâ indi ka maghimò sing malain. indi ka maglubag sang katarungan, indi ka magpatuga
sang mga kaibog!...
K A T A P U S A N
