amó nga gikab, apang sa amát-amát nagpalayô dirâ subong
abi nga ang iya handumanan ginkalimtan na sang mga indyo.
—¡Matahúm nga panugiron! —silíng ni Ben Zayb,— masulát akó sing isá ka artikulo. Masubô!
Si donya Victorina naghunâhonà nga mapuyô man sa gikab kag buót na siá kuntani masilíng, sang maunahán siá ni Simoun sa paghambal:
—Apang anó ang imo hunâhonà nahanungód sinâ, P. Salví?— pamangkot niya sa pransiskano nga naunáy sa pagpadalum sang iya panumdoman. Indì balá sa imo hunâhonà nga ang Iya Labíng' Halangdon, sa baylo nga maghatag sa iya sing isá ka gikab, dapat magbutáng sa iya sa isá ka beateryo, sa Sta. Clara³ halimbawà?
Bumatyag sing kahadlok si P. Sibyla nga nagtulok kay P. Salví nga nagpalangurog kag ginpalapaw niya kay Simoun ang iya panulok.
—Kay indì inâ maayo nga pag-amuma, —padayon ni Simoun sa bagay nga walâ gid magliwát,— nga hatagan sing puloy-an nga bató ang isá nga ginhampangán naton ang iya mga paglaum; indì sunô sa pagtuluohan nga pabay-an siá sing amó inâ sa mga panuláy, sa isá ka gikab, sa bibì sang subâ; nga daw subong abi sa mga diwata nga talunanon, kuntani nangin-labí kaayo nga pag-amuma, labi ka diwanhon, labi ka mahigugmaon, labí nga nagakasundò sa ginahimò sa sini nga pungsod ang pagbutáng sa iya sa Sta. Clara bilang isa ka bag-o nga Heloisa, nga duawon kag lipayon siá kon kaisá: Anó sa imo?
—Indì akó makahimò bisán dapat maghukóm sa mga ginahimò sang mga arsobispo,— sabát sang pransiskano nga daw walâ sa iya buót.
— Apang ikaw nga amó ang gobernador eklesyástiko, nga yarà sa duóg sang aton arsobispo, anó ang imo himùon kon ang amó nga butang mahanabò sa imo?
Si P. Salví pumakinhol sang iya mga abaga, kag sinugponán niya nga may katawhay:
___________________
8 Sta. Clara— Sa beateryo sang Santa Clara, nga sa idalum sang pagdumala sang mga pransiskano, si Pari Salvi buót kuntani maglugos sang nobya ni Juan Crisostomo Ibarra. Sa amó nga beateryo, subong man sa kolehiyo sang Santa Isabel kag sa ibán man sa Manila, ang tingog sang banwa nagasiling nga ang ibán sang mga prayle nagpakalakás sang ila gahúm nga ginhatag sa ila sa pagka-ministro sang Ginuo! Nagsugid ang tagsa ka maragtas!
