— Nagkarí siá sa pagbuylog sa bangkay man sang iya amáy, —sabát ni P. Sibyla. —Indi balá yadto isá man ka mabinatukon, P. Salví?
—Inâ ang mabilang naton nga kubós sing kahinguyangan nga paglubóng P. Camorra, no?— Siling ni Ben Zayb.
—Dalayon ko ginhambal nga mga mabinatukon ang walâ nagabayad sang madayaw nga mga pagpalubóng,— sabát sang ginpahanungdan nga nagkinadlaw sa daku nga kalipay.
— Apang ano ang nahanabò sa imo, Gg. Simoun? —pangkot ni Ben Zayb nga gintan-aw niya ang manog-alahás, nga walâ paghulag kag nagpadalum sang iya hunâhonà. — Ginadagát ka balá, ikaw, manglulogayaw, kag sa isá ka tulô nga tubig katulad siní?
—Isiling ko sa imo, —sabát sang Kapitan nga may kahamùot sa amó nga mga duóg,— ayaw pagtawga iní nga isá ka tulô nga tubig; dakú iní kaayo sa maskin diín nga linaw sa Suiza kag sa tanán nga linaw sa España kon tingbon; ang dumáan nga mga sakayanon nakità ko nga gindagát dirí."7
______________
7 Ang linaw sa Laguna, diín bag-o lang makasulód ang bapor nga Tabo, sa pagkatutuo may tuman nga kasangkarón: may kapin siá sa 36 ka legua (ang isá ka legua sang katsila, timbang sang apat ka milya sang ingles) palibot. Sa baybayon nayon sini nga linaw nabun-ag si Rizal.
