Nagligad ang isá na man ka tuig, nag-abót ang isá man ka patubás nga maayo, kag tungód siní kag sinâ nga kabangdanan, pinasakàan sang mga prayle ang balayran sa kalim-an ka pesos, nga binayaran ni Tales agúd indì na maggamo kag tungód man nga gin-isip niya nga mabaligyà niya sing maayo ang iya kalamay.
— Pagpaumod! Bilanga nga ang buaya nagdakô, —silíng sa iya ni Lolo Selo sa pag-uloulo sa iya.
Sa amó nga tuig natigayon niya ang iya ginhandum; nga magpuyê sa kadam-an, sa iya baláy nga tapi, sa baryo sang Sagpang, kag ang amáy kag ang lolo nag-isip nga patun-on nila ang duhá ka mag-útod nga lalaki, labí na gid ang batà nga babae, nga si Juliana ukón si Juli, nga amó ang ila pagtawag sa iya, nga ginpanan-aw nga sa ulihe mangín-isá ka pamatan-on nga babae nga mapalaron kag maayuayo. Ang isá ka batà nga lalaki nga abyan sang panimaláy, nga si Basilio, nagtuón na sadto sa Manila, kag ang amó nga pamatanon naghalín man sa tuman ka kubós nga duyan katulad nila. iní
Apang ini nga handum daw mahanabò nga indi matuman.
Ang nahauná nga butáng nga ginhimò sang kumboyahan sang makita nila nga ang panimaláy nag-uswag sing amátamát, amó ang paghimò nga Pangulo sang Baranggay (Cabeza de Barangay) sang katapò sang panimaláy nga amó ang labí nga nagpangabudlay; si Tanò, ang maguláng nga batà, napulò kag apat pa lamang ka tuig ang kagulangón. Hantì, gintawág, si Kabesang' Tales, nagpahimò sing tsaketa, nagbakál sing isá ka kalù nga piltro kag nag-aman sing mga hilinguyangon. Agúd walâ siá sing gamó sa parì ukón sa pangulohán, naghingayaw siá gikan sa iya kaugalingon nga palhok sang mga kakulangan sa mga buhís, nagbayad nahanungod sa mga naghalalín kag mga nagkalamatay, nag-usik sing madamò nga tinaknà sa mga pagpanukót kag sa mga pagpakadto sa ulo-banwa.
—Pagpaumod! Bilanga nga ang mga himatâ sang buaya nagdulugok, —silíng ni Lolo Selo nga nagkadlaw sing maanyag.
—Sa tuig nga maabót magapanapót ka sang may kola kag makadto ka sa Manila sa pagtuón katulad sang mga senyorita
