—Saráng ninyo mahimò ang luyag ninyo, Gg. gobernador, isá akó ka pakok kag walâ akó sing mga kusóg. Apang gintalauma ko inâ nga mga kaumhan, ang akon asawa kag ang akon anák napatay sa pagbulig sa akon sa pagpanghawan sinâ kag indi nakon inâ pag ihatag kundi sa isá nga saráng makahimò kapin sangsa akon na nahimò. Nga patayunán niya anay inâ sing dugô kag ilubóng dirâ ang iya asawa kag ang iya anák nga babae!
Tungód siní nga pagkabatinggilan ang dungganon nga mga hukóm naghatag sang pamatbat apin sa mga prayle kag ang tanan nagkadlaw sa iya nga nagsilíng nga sa katarungan ang mga kasabà indì madaóg. Apang siá nagpasakà sing apelasyon, kinargahan niya ang iya eskopeta kag mahinay nga ginlibutlibot niya ang mga lindero. Sa siní nga tinión ang iya kabuhi daw isa ka nagtagumtayon. Ang iya anák nga si Tanò, isá ka ulitawo nga dakâ subong sang iya amáy kag maayo katulad sang iya utod nga babae, nahimò nga kintos, pinabayaan niya siá nga mahamulág sangsa magbakál sang isal-i sa iya.
— Mabayad akó sa mga mananabang,— silíng niya sa iya anák nga babae nga naghibî. —Kon madaóg ko ang kasabà makahibaló akó magpabalik sa iya, kag kon maparót akó walâ akó sing kinahanglan sang mga anak nga lalaki.
Ang anak nagtaliwan kag walâ na sing balità nga nabatìán tungod sa iya kundi nga kiniskisán nila sing buhok ang iya ulo kag kunó nagtulog sa idalum sang karo. Sang pagligad sang anum ka bulan ginsugid nga nakità nila siá nga pinasakay pakadto sa Carolinas; ang ibán nagpati nga nakità nila siá nga nag-uniporme sang pagka-gwardya sibil.
—Gwardya Sibil si Tanò!— Surmariosep!4 —may kunyag nga hambal sang isá kag isá nga nagtákop sang ila mga kamót. —Si Tanò tuman kaayo kag kadungganon! Rekimeternam!
Ang lolo pumaligad sing madamò nga inadlaw nga wala
gid makabungát sing tinagâ sa amáy, si Julî nagmasakit, apang
si Kabesang' Tales walâ gid magpatulò sing bisán isá ka bantok
______________
4Susmariosep- Palip-ot sang pakugmat sa kinatsila: Jesús, Maria, José!
