maghatag man sia sa mga dinid-an kag ginahingabot. Kag
tungod sina ginpangayoan nila sia sing lima ka gatos ka pesos
nga gawad paagi sa isa ka umanhon, nga nagpasalig nga kon
ano ang mahanabo sa ginsugo, ang dinakop mabayad sang
iya kabuhi. Naghatag sila sing duha ka adlaw nga panahon.
Ang balita naghatag sa kailo nga panimalay sing daku nga kakugmat kag nagdugang pa gid sang mahibal-an nila nga ang Gwardya Sibil malakat sa pagdakop sang mga tulisan. Kon mahanabo ang isa ka pagkitaay, ang nahauna nga mabutang sa katalagman amo ang dinakop, ina nahibal-an sang tanan. Ang tigulang wala makahulag kag ang anak nga babae, nangluspad kag kinugmat, makapila sia naghimulat sa paghambal apang indi sia makatikab. Apang ang isa ka panghunahona nga labi ka makakulogmat, isa ka kaisipan nga tuman kapintas amo ang nagpahanguyos sa ila sa ila paghilipos. Ang umanhon nga ginpadala sang mga tulisan nagsiling nga ayhan ang guban magapalagyo, kag kon magdugay ang paghatag sang gawad, pagligad sang duha ka adlaw gulgulon nila ang liog ni Kabesang’ Tales.
Ini nagpabuang sa amo nga duha ka tinuga, nga lunsay mapigaw, lunsay wala sing mahimb. Si Lolo Selo matindog, mapungko, manaog sa hagdanan, masaka, indi makahibalo kon diin makadto, kon diin mapaatubang. Si Juli kumapyot sa iya mga santos, inisip kag inisip niya ang kwarta, kag ang duha ka gatos ka pesos wala pagdugang, indi magbuad; sa hinali umilis, tinipon niya ang tanan niya nga alahas, nangayo sing laygay sa iya lolo, makadto sia sa pagpakigkita sa gobernadorsilyo, sa hukom, sa eskribyente, sa tenyente sang Gwardya Sibil. Ang tigulang naghangdb sa tanan, kag sang ang anak nga babae magsiling nga indi, wala man sia sing isiling. Sa katapusan nag-alabot ang pila ka mga kasiling nga mga himata kag mga abyan nga babae, nga ang iban sa ila mga imol sangsa iban, nga labing’ wala’y namasngaan kag labi nga nagpadugang sang kahadlok. Ang may kapin nga nahibal-an sa tanan, amo si Hermana Bali, isa ka daku nga manogpangginggi nga nakapuyo sa Manila sa paghanas sa beateryo sang Kumboyahan.
Ibaligya ni Juli ang tanan niya nga alahas Iwas lamang ang isa ka relikaryo ukon handumanan nga may mga brilyan-
