Ang gab-i masubô: walâ sa ila nga duhá sing may nakatimô sang pagkaon kag ang tigulang walâ maghigdà nga pinaligad niya ang bug-os nga gab-i nga naglingkod sa isá ka higád, nga walâ magtikáb sing bisán isá ka tagâ, nga walâ bisán lamang maghulag. Si Juli sa iya bahin buót matulog, apang sa madugay indì makakipot sang iya mga matá. Daw labí nga malinóng na siá nahanungód sa kapalaran sang iya amáy, siá nagpanumdom sang iya kaugalingon kag nagsagad hibî nga naghibî nga ginpunggan niya ang iya mga paghibubun-ot agúd ang tigulang indì makabatî. Sa masunód adlaw mangín-isá na siá ka sulogùón, kag amó man gani ang adlaw nga si Basilio manog-abot halín sa Manila sa pagdalá sa iya sing tagdiutay nga mga dulot... Sa nahauná dapat niya isikway ang amó nga paghigugma; si Basilio nga sa madalî mahimò na nga médiko indi dapat nga magpakasal sa isá ka Kag nakità niya siá sa iya aninaw nga si Basilio nagpakadto sa isá ka simbahan nga nagbuylog sa isá ka labíng' maanyag kag labing' manggaranon nga lin-ay sang banwa, napanapután sing maayo, nga mga malipayon kag nagyuhóm silá nga duhá, samtang nga siá, si Juli, nagsunod sa likód sang iya agalon, nga nagbitbit sang mga nobena, mga buyò kag sang duloplaan. Kag dirí ang pamatan-on nga babáe bumatyag sang tuman nga pagpalanghugót sang iya tutonlan, pagpin-ot sang iya dughan, kag sa Birhen nangayò siá nga patyon na lang siá nga daan.
— Apang, —silíng sang iya ipalatugsiling,— mahibal-an niya nga ginpasulabi ko ang magprenda sang akon kaugalingon sangsa magprenda sang relikaryo nga iya gindulot sa akon.
Ini nga panghunâhonà nakalipay sa iya sing diutay kag naghatag sing labáy nga mga dalamguhanon. Sin-o ang nakasayod? Saráng mahanabò ang isá ka milagro: Makakità siá sing duha ka gatós kag kalim-an ka pesos sa idalum sang larawan sang Birhen; nakabasa siá sang madamò nga milagro nga katulad siní! Ang adlaw mahimò nga indì magbutlak kag indì mag-abót ang aga, kag sa karón madaóg nila ang kasabà. Saráng makabalik ang iya amáy, si Basilio maabót; siá makakità sing isá ka sako nga bulawan sa talamnan, ang mga tulisán madalá sa iya sang sako; ang kura, si P. Camorra,
