kay hari Bernardo,3 ayhan nga ginsaypan nila kay Bernardo
del Carpio.
— Kon makalwás na ang iya tuó nga tiíl, —kibot sang kotsero nga pinunggan niya ang pagginhawá, — ihatag ko sa iya ang akon mga kabayo. maalagád akó sa iya tubtob akó mapatáy Lwasón niya kitá sa mga sibil.
Kag sa masulub-on nga panulok sinunód niya ang tatlo ka hari nga nagpalayô.
Ang kabataan nagsulunód sa duhá ka kubay, nga mga
masulub-on, mga maligdong, nga daw pinilit sa pakusog. Ang
ibán nagsuga sing mga huepe ang ibán mga kandilà kag ang
ibán mga parol nga papel sa mga tukón nga kawayan, nga
nagpalangadî sa mabaskog nga tingog sang rosaryo nga daw
may ginkaakigan. Sang ulihe nagsampot si San José sa mahinay nga mga tikáng, nga may nawóng sang pagkamasinulundon kag masubô kag ang iya baston mga bulak sang mga
asusena, sa tungâ sang duhá ka gwardya sibil nga daw gindalá
siá nga binilanggò: nián nahangpan sang kotsero ang balatyagon
sa nawóng sang santos. Kag amó kay ang pagpakità sang
mga gwardya nagtublag sa iya ukón walâ siá sing daku nga
katahâ sa santos nga nagbuylog sa amó nga gubán, walâ siá
magpangadi sing bisán isá lamang ka requiem aeternam.
likód ni San José nagsulunód ang kabataan nga babae nga
nagsulogâ, natabunan ang ila mga ulo sing panyù nga nahigót
sa ubós sang ila sag-ang, nga nagpalangadi man sang rosaryo
bisán sa diutay lamang nga pagpangakig katulad sang kabatàan nga lalaki. Sa tungâ makità ang pilá ka kabataan nga
nagguyod sang mga kulokuneho nga papel-de-hapon, nga
nasug-an sing mga magagming nga kandilà nga pulá, nga natindog ang diutay nga ikog nga papel nga tinabas. Ang kabataan nagbuluylog sa prosesyon nga dalá nila inâ nga mga
hampanganan sa pagpasadya sang pagkatawo sang Mesiyas.
Kag ang mga sapatsapat, nga matambok kag matibunog katulad sang itlog, daw nalipay kaayo kay kon kaisá malukso, malingkang, mahulog kag masunog; ang tag-iya mahimulat sa
_____________
3.. hari Bernardo- Ini nga sugid nahanungód sang hari nga ginkadenahan buhi pa gihapon sa ibán nga bahin sang puód sang Batangas. Ang mga tagalog, sadto'ng mga panahón sa ila kaugalingon nga pagpangabuhi, sa isá ka pulong, dinag-on sang wala pa makaabot ang mga katsila, may ila silá nga mga hari ukón mga manggagahom.
