pagpalong, huypon niya nga huypon, palungon ang kalayo nga
iya waswasán kag kon makità na niya nga gubâ na mahibî
siá. Ang kotsero nakamutík nga may kahanusbò nga ang
kabikahan sang magagmay nga mga sapat nga papel nagkapapas sa tagsa ka tuig nga daw gin-agihan man sang piste
katulad sang mga sapat nga buhi. Siá si Sinong nga ginsakit, nakadumdom sang iya duhá ka matahúm nga kabayo,
nga agúd matipigan nga indì malatnan iya ginpabendisyonán
sunô sa tudlo sa iya sang kura nga ginbayaran niya sing napulò
ka pesos: — bisán ang pangulohán ukón ang mga kura walâ
makakità sing labí siní nga kalalangan sa pagsagang sang pamiste sa mga sapat— kag wala'y sapayán siní tanán nagkalamatay. Wala'y sapayán nagpauloulo siá kay, kutob nga nawiskan sing bendita, sa mga linatín sang Parì kag mga seremoniya, ang mga kabayo nagbalatyag sing bugál, ginhatagan
sing kamahalan nga walâ na pagpatakdi kag siá, sanglit maayo
nga kristyanos, walâ magpangahás sa paghanot sa ila kay ang
isá ka Hermano nga pangatlo nagsilíng sa iya nga ang mga
kabayo benditado.
Nagtapos sang prosesyon ang Birhen, nga nagpanapót sa pagka-Balaan nga Pastora nga nagkalò sang may malapad nga paldiyas kag may malagbà nga mga plumahe, sa pagpakilala sang iya pagpakadto sa Jerusalem. Kag sa katuyòán nga masaysay ang pagkatawo, ginmandòán sang kura nga pahabukon pa gid ang iya saya nga gindaskan sing mga trapo kag algodon sa sulód sang iya mga palda, sa bagay nga walâ sing magpangduhadoha sang kahimtangan nga makità siá. Isá yadto ka matahúm nga larawan, masubô man nga katulad sang mga pangguyahon sang tanan nga ibán nga larawan nga ginhimò sang mga pilipinhon, nga may pagkamahuluy-on, sa bagay nga amó ang pagbutang man sang kura. Sa atubang sang Birhen may pilá ka manog-ambahan nga lalaki, sa likód may pilá ka músiko kag ang nag-ulobáy nga mga gwardya sibil. Ang kura, nga amó ang ginpaabót sang matapos ang iya ginhimò, walâ magabót: sa amó nga tuig naglain kaayo ang iya buót nga naggamit sang tanan niya nga masarangán sa pag-alungáy kag paghambal nga may litâ sa pagpatuman sang mga pumoluyò
