nga magbayad sing katloán ka pesos sa tagsa ka misa sa aginaldo sa baylo sang duhá ka pulò nga amó anay ang bilí.
— Nagmabinatukon kamó,— silíng niya.
Ayhan nalingaw kaayo ang kotsero sa mga butang nga iya nakità sa prosesyon kay sang iní kumabos na kag sinugò siá ni Basilio nga padayunon ang paglakát, walâ niya matalupangdi nga ang parol sang karomata napalong. Si Basilio sa iya bahin walâ man makamutík, nga nalingáw man sang tulok sa mga baláy, nga nasug-an sa sulód kag sa lwás sang mga magagming nga parol nga papel sa mga dagway nga matahúm kag may nanarîsarì nga mga duág, sa mga bulobitùon nga may mga lugway palibot nga may mga ikog nga malagbà, nga kon huypon sang hangin, nagatuga sang matam-is nga hagunghong, kag mga isdà nga ang ila mga ikog kag mga ulo naghulolag nga may mga baso nga nasudlan sing lana sa sulód, nagkalabit sa mga bintanà nga naghatag sing tuman katam-is nga danyag sang pandot nga malipayon kag naanaran. Namutikán man ni Basilio nga ang mga puniponing' kasanag nagbuhin, nga ang mga bulobitùon nagkatunaw kag sa amó nga tuig may kubós nga kadamùón ang mga puníponi sa mga babáe kag mga binitay sangsa nagligad, kag iní kubós pa gid sangsa palaabuton . . . Halos nga may músika sa mga dalan, yadto'ng masadya nga kinagahod sa kosina indi na mabatián sa tanán nga balay kag ginpahanungód iní sang pamatan-on sa panahón nga malain, indì maayo ang pamaligyàon sang kalamay, ang patubás sang humáy nagkunhod, nagkalamatay ang halos katungâ sang mga hayop kag ang mga alamután nagsalakà kag nagdulogang nga walâ mahibal-i kon tungod sa anó ukón ngaa, samtang nga ang mga kalakasán sang mga Gwardya Sibil nagdugang nga nagpatay sang mga kalipay sang kabanwahanan.
Amó iní ang ginpanghunâhonà sang pamatan-on sang ang isá ka Altol nga mabaskog dumaghob sa hangin. Nag-agi silá sa atubangan sang kwartel kag ang isá sang mga gwardya nakakità sang parol sang karomata nga walâ sing sugâ kag ang salakyan indi makapadayon nga amó iní. Nagsugod sa pagulán ang binantok nga mga pasipala sa kailó nga kotsero nga walâ pagpamatii ang iya pamalibad tungód sa kalawig sang mga prosesyon, kag sanglit dakpon siá sa paglapas sang pa-
