bando, kag ibutang sa ulihe sa mga pamantalaan, ang mahidaiton kag mahalungon nga Basilio nanaog sa. karomata kag pinadayon niya ang iya paglakat nga tinus-on :na lamang niya ang
iya maleta.
Yadto amo ang San Diego, ang iya banwa, diin wala sia sing bisan isa ka himata . . .
Ang balay lamang nga sa iya pagtan-aw malipayon amo ang iya ni Kapitan Basilio. Ang mga manok nga sulog kag munga nagkinakak sang mga ambahanon sa kamatayon nga ginbuylogan sang mahinay nga linagatok nga daw may gintuktok nga karne sa tapalan, kag sang sinirit sang mantika nga nagbukal sa kalaha. May badu sa amo nga balay kag naglambot tubtob sa dalan ang dapya sang hangin nga nagpangamyon sang mga ginisa kag mga linuto.
Sa silong sang balay, nakita ni Basilio si Sinang4 nga manubo man gihapon katulad sang makilala sia sang aton mga bumalasa, bisan nga nagtulutambok kag nagtulotibunog kutob sang makasal sia. Kag sa daku niya nga katingala nakita niya didto sa sulod, nga nagpakigsugilanon kay Kpn. Basilio, sa kura kag sa alperes sang Gwardya Sibil, ang indi liwan kundi ang manog-alahas nga si Simoun nga sa gihapon may tagusilang nga asul kag sa panghulag nga hilway.
Nahangpan ko, Gg. Simoun, — siling ni Kpn. Basilio. — Makadto kita sa Tiani sa pagtan-aw sang imo mga alahas.
— Ako malakat man, —hambal sang alperes, —kay kinahanglan ko ang isa ka kadena sa taknaan, apang may mga hilikuton pa ako . . . kon si Kapitan Basilio kuntani mahimo nga matugnan . . .
Si Kapitan Basilio nangako sa daku nga kabubut-on kag sanglit maluyag sia magpakighirop sa militar agud nga indi paggamuhon ang iya mga mamumugon, indi sia maluyag mag baton sang kwarta nga ginpilit sang alpires sa pagkuha sa iya palhok.
— Dulot ko ina sa Paskwa!
— Indi ako magpahanugot sina, Kapitan, indi ako magpahanugot!
______________
4 Sinang — Ang isa ka tinawo sa Noli me tangere; isa sang mga abyan ni Maria Clara, nga kahagugma ni Juan Crisostomo Ibarra.
