SANG ANG MGA lingganay magsugod sa pagbagting sa paghiwat sang misa sa tunga'ng gab-i, kag yadto'ng mga nagpalasulabi sang maayo nga katulugon sangsa tanán nga pandot kag mga seremoniya nagkulumod batok sa kinagahod kag ginìusgìos, si Basilio nanaog sing tagù sa baláy, maka- duhá ukón makatlo nga naglulantaw sa pilá ka dalan kag, nagsalig nga walâ sing nagsunód ukón nakakità sa iya, kinuhà niya nga alagyan nga talagsa ginsayuhán ang dalan padulong sa dumaan nga talunan sang mga Ibarra, nga ginkuhà ni Kpn. Tiago, sang mabutong ang ila mga pagkabutáng, nga gin- patabà.
Sanglit sang amó nga tuig ang Pagkatawo natùon sa latî sang bulan, naghari didto ang bug-os nga kadulóm. Ang ripike sang lingganay nag-untat na kag mga linagapak na lamang ang mabatián sa tungâ sang kalinóng sang gab-i, nga naglapós sa ugoy-ugoy sang mga dahon nga gin-uyog-uyog sang dupoydupoy kag sa may kumpas nga nguloynguyon sang mga balód sa malapit nga linaw, katulad sang gamhanan nga pagginhawa sang kinaugali sa madalum nga katulugon.
Binatyag niya ang danyag sang duóg kag sang tinión, padayon nga naglakát ang pamatan-on nga nagdungók nga daw makakità sa kadulóm. Sa tión kag tión nagtulotanglà siá sa pagtan-aw sang mga bitùon sa mga nakawàán nga gin- utlan sang mga sangá sang kakahuyan, kag pinadayon niya ang iya paglakát nga iya ginwahig ang mga gamhon kag gin- pamali ang mga balagon nga nagsablag sa iya alagyan. Kon kaisá mabalik siá sa iya gin-agihan, ang iya tiil makagùot sa naggumon nga mga gamhon, sa gamót nga naglutáw ukón masalunòán man niya ang isa ka bútang. Pagligad sang tungâ sa taknà nakaabót siá sa isá ka diutay nga sapâ nga sa
