Kinutkot sang manog-alahás ang dutà, kag sa tión kag tión ang lámpara nagsilak sa iya guyá: walâ siá sing mga tagusilang nga asul nga amó ang nagpaliwát sang iya dagway. Nagpalangurog si Basilio. Siá amo man yadto'ng tawo nga walâ makilal-i nga sang napulò kag tatlo ka tuig nga nagligad nagkutkot dirâ sang lulobngan sang iya ilóy, lwás lamang nga karón nagtigulang na; ang iya mga buhók nagbulokáy kag nagpatubò sing bigote kag burangos, apang ang panulok amó man gihapon, amó man nga mapaít nga pangguyahon, may amó man nga lagtum sa agtang, amó man nga mga butkon nga maunod, nga daw malum-ok na karón, may amó man nga kabaskog nga madalás. Ang mga larawan sang nagliligad nagbalalik sa iya, daw binatyag niya ang kainit sang dabók, ang gútom, ang pagkadulà, sang iya paglaum sadto, ang bahù nga ginkutkot ... Ang iya pagsapó nagpakugmat sa iya. Gani nga ang manog-alahás nga si Simoun nga nagpaka-indyo nga inglés. portugis, amerikanhon, kayumanggi, Kardinal nga Mailúm, Halangdon nga Maitúm, ang malain nga espíritu sang Kapitan Heneral nga amó ang pagtawag sa iya sang kadamban, indi liwan kundi ang makatilingala nga walâ makilal-i nga ang iya pagpakità kag pagkadulà naghitupol sa pagkapatáy sa linaw sang manunoblì sang amó nga kadutàan. Apang sa duhá nga walâ makilal-i nga nagpakità sa iya, sa patay kag sa buhî sin-o sa ila si Ibarra?
Ini nga pamangkot nga sa makapilá iya ginsulit kon hambalón ang kamatayon ni Ibarra, nagbalik liwát sa iya panumdoman sa atubangan sang amó nga tawo nga iya nakità didto.
Ang patay may duhá ka pilás nga dapat nagikan sa mga ilulothang, sunô sa iya nahibal-an sang ulihe, kag amó ang nahanabò sa paglagás sa linaw. Ang patay dapat nga si Ibarra nga nagkadto sa amó nga duóg sa pagpanginmatay sa ibabaw sang lulobngan sang iya katigulangan, kag ang iya luyag nga tutdan siá nagpakilala sing maayo sang iya pagpuyô sa Europa diín kinabatasan ang pag-upós sang bangkay sang patay. Hantì sin-o man ang isá, ang buhî, iní nga manog-alahás nga si Simoun, nga sadto sa kahimtangan nga makaluluoy kag karón nagbalik nga napun-an sing bulawan kag abyan sang mga
