punòan? Dirâ may isá ka katingalahan kag ang tumuluon,
sa iya kinaugali nga mabugnaw sing dugo, nagtug-an sa pagpaathag sinâ, kag naghulát sing isá ka hitabô.
Si Simoun nagkutkot nga nagkutkot, apang nakità ni Basilio nga ang iya anay kusóg nagkadulà na; si Simoun naghapûhapó, nagginhawa sing mapin-ot kag nagpahuway sa tagsa ka tión. Si Basilio, hinadlukán nga basi masapwan siá, nanghunâhonà sing maabtik, tumindog sa iya ginpungkòán kag sa tingog nga kinaandan kaayo nagsilíng:
- Saráng ko ikaw mabuligan, ginuo ...? - pangutana niya nga naggwâ sa palanagòán.
Maabtik nga tumadlong si Simoun kag nakalukso katulad sang isá ka tigre nga nadakpan sa buhat, sinuksok niya ang iya kamót sa bolsa sang iya amerikana kag tinulok niya ang tumoluon nga nagpangluspad kag masulub-on.
-Sang napulò kag tatlo ka tuig nga nagligad nakahatag ka sa akon sing isá ka daků nga bulig, ginùo, padayon ni Basilio nga walâ makibang, sa siní man nga duóg, nga naglubóng sang bangkay sang akon ilóy, kag bilangon ko nga akó malipayon kon mabuligan ko ikaw.
Si Simoun, nga walâ niya pag-ibulág ang iya mga matá sa pamatan-on, kumohà sa isá niya ka bolsa sang rebolber. Nabatián ang lagatik sang gato subong sang ilulothang nga ginpangangá:
-Sino ang pagbilang mo sa akon? -silíng niya nga nag-isol sing duhá ka tikáng.
-lsá ka tawo nga sa akon balaan, sabát ni Basilio nga bumatyag sing kahangawà, nga nagtùo nga nag-abót na ang iya katapusan nga tión. Isá ka tawo nga sang tanán, lwás lamang akó, ginapatihan nga patay na kag ang iya malaot nga kapalaran ginakasakitan ko sa gihapon.
Ang talahàon nga kalinóng bumulós sa sini nga mga tinagâ, kalinóng nga sa pamatan-on daw isá ka wala'y katubtoban. Si Simoun, wala'y sapayán, sang tapos makaligad ang malawig nga pangduhadoha, pumalapit sa iya kag tinangday sa iya abaga ang iya isá ka kamót naghambal sa iya sa tingog nga makatalandog:
