<brsa tawo. Kong ikaw dato mahigala mo ang mga makinaadmanon ug hangtud mahimo mong sulugoon kay ang salapi mao ang Dios sa kalibutan. ¿Buot kag kinaadman? Kong duna kay salapi makab-ot mo kanang tanan.
—Ang mga kaubang kong kabataan kanunay sila sa tunghaan...
— Kong kanang kakugi karon sa pagtuon sa mga kabataan mao pa ang gigamit sa pagpangita sa katigayonan, tingali dili abuton sa gutom ang atong Yutang Natawohan. Ang tanan buot magatuon sa tunghaan hangtod sa pagkatigulang bisan wala silay kahigayonan sa pagpadayon sa tunghaan. Ang atong mga kaumahan nalibon na lang kay gibiyaan sa mga bukton nga manggibuhaton; ang patigayon sa atong kaugalingong lungsod anaa sa kamot sa mga lumalangyaw hangtod ang atong mga kagamaan silang tanan atong gibiyaan tungod kay ang atong mga batan-on atoa na lang sila magatubo sa mga tunghaan... Ah, wala kita makapahimulos sa mga bahandi sa atong yuta: mga mina sa karbon, bulawan, pilak, gas, aspalto, puthaw, ugb. Wala kita makasalapi sa atong mga maayong kahoy ug sa atong dato nga kadagatan nga puno sa mga mutya ug nagakalainlaing mga isda. Sa usa ka pulong, ang mga bahanding kaugalingon (Recursos naturales) dili kita ang nakapahimulos kay ang mga tawo buot na lang mabuhi sa Kagamhanan. Ang mga kabataan buot sila mahimong Magtutuon, buot mahimong mga Manlalaban ug nabuang sa pamunoan!
—Dili ka diay buot, Tay, nga magatuon ang atong mga kabataan?
