— ¿Nganong dili? Apan buot ko nga ang anak sa mga kabos kong mahibalo na sila magabasa, magasulat ug muihap mugula sila sa tunghaan ug adto nila tapusa ang ilang pagtuon sa kaumhan. Maayo unta nga ang Kagamhanan magabuot nga ang pagyuta, pagkapanday ug ang kabuhatan maoy itudlo, maora gayod, sa mga Tunghaan sa kabalangayan!
Samtang sila nagasultisulti miabot sila sa ganghaan sa balay ni Kapitan Juan Rompebanco. Sa tapos nila iasoy ang ilang tuyo, gidawat si Jose sa pagkabinatonan ug gihatag siyag suhol nga duha ka pisos ang bulan.
Ang buhat nga gihatag kang Jose Magaya sa iyang agalon mao ang pagbantay sa mga baboy, paglabay sa mga hugaw ug ang pagpamilino sa karomata.
Si Jose mahigugmaon kaayo sa "Cuenta". Usa ka hapon niana nga nagabantay siya sa mga baboy nga iyang gilawogan, nagahunahuna siya niini:
—Ang "Cuenta", alang kanako, maora ang matuod nga kinaadman kay dili mgagalimbong ug dili ka limbungan.
Samtang nagaugay-ugay siya sa usa ka buok nga bakting bayi nga pinaganyo niya sa iyang agalon pinahinungod sa iyang suhol nga duha ka bulan, nagatuon siya sa "Multiplicar".
—Unya kong nagaanak kini ug lima ka buok ug mahalin tag lima ka pisos ang usa aduna akoy kaluhaan ug lima ka pisos. Ipalit ko usab ug baboy nga unya mahalin kanakog tag... ka pisos...Ug
