gihisgutan na ang Katipunan sa likod sa mga Punoang katsila. Ning panahona mimahal ang bili sa mga sundang ug si José Magaya, ang maayong lalaki sa "Multiplicar", nakapahimulos kaayo ning patigayona.
-Samtang may hangin bukharon ta ang layag, ug samtang nagaulan manalod kita.-Nagakanayon si José sa diha nga siya nagabaguod pas-an sa sundang padulong sa kabukiran nga nahalin sa mamisos ang pinalit niya ug 25 ka sintabos.
Ang mga panday sa sundang sa Basak ug sa Consolación maoy iyang mga suki.
Sa dugay na niyang pamaligya nagadala na siyag tawong sinuhulan sa pagpas-an sa mga puthaw uban kaniya padulong sa kabukiran sa X. T. ug sa mga dapit diin magakapundok ang daghang mga manggugubot batok sa mga katsila.
Sa tapos ang gubat batok sa España miundang si José sa patigayon sa sundang ug misulod na usab siya sa pagpamaligya mga manggad ug mga pitsi-pitsi nga gipuhunanan niyag lima ka libo ka pisos, salapi nga natigom niya sa napulo ka tuig nga kanunay pakigbugno sa kinabuhi.
Didto siya magatinda sa X. ug mao ray iyang kaparang sa patigayon si Kapitan Juan Rompebanco, ang kanhi iyang agalon..
Sa pagpahibalo kaniya sa iyang mga higala nga ang mga pilipinhon ug mga amerikanhon nagakaaway, kun nabugto ang ilang panagabyan, gihipos niya ang iyang tanang mga baligya nga wala pa kahalini ug gitaguan niya sa kabukiran. Samtang naabo ang lungsod sa X. ug T. nga gisunog sa mga sundalong amerikanhon,
