kong kasubo napilit ang iyang hinutangan sa pagdangop sa mga Hukmanan aron sa pagbayad kaniya sa iyang utang nga kap-atan ka libo ka pisos walay labot ang iyang mga tungtong. Si Kapitan Juan Rompebanco wala magalimod sa iyang utang ug mao nga ang Hukmanan sa Sugbo nagasugo sa iyang hukom nga si Kapitan Juan Rompebanco sakmitan sa tanan niyang katigayonan sa lungsod sa X., T. ug sa bisan diin, ug ibaligya sa Sheriff pinaagi sa "publica subasta", sumala sa ginasugo sa mga balaod, aron ang halin ibayad sa iyang utang. ¡Wala nay mapait ug malisod nga panahon sama niadto! Walay takos kadangpan kay tanan nagalisod sa salapi. Ang iyang mga kaila ug mga higala pulos lang pamalibad nga:―"Pasayloa ako kay wala gayod karon akoy salapi".
Sa ingon ning pagkabutanga, ang mga yuta ug uban pang mga butang ni Kapitan Juan nga mubilig usa ka gatos ka libo ka pisos nahalin lang, ¡intawon!, sa "subasta" ug napulog lima ka libo ka pisos. Walay salapian nga mipuhal niadtong panahona kay nahadlok sila sa pagbuhig salapi tungod sa gubotgubot sa mga Pulahan sa kabukiran sa Sugbo, Negros, Samar ug Leyte.
Usa ka bantan-ong olitawo nga katagilungsod ra usab ni Kapitan Juan Rompebanco, usa ka tawo nga kanhi nagabahagbahag lang sa kadalanan sa X. ug T., usa ka batan-on nga kanhi olipon ni Kapitan Juan ug manlalawog sa iyang baboy, mao ang nakapalit sa "publica subasta" sa tanang mga katigayonan ni Don Juan Rompebanco.
¿Kinsa kining bataa? Mao kini karon ang atong subayon.
7
