L' théâte orprésinte : Ein cabinet d' méd'cin eine porte au milant ; à l'plache de l' serrure eine petite plaque, sur ceulle plaque, on lit: Mettez deux francs dins l'ouverture et l' porte s'ouvrira automatiqu'mint; eine porte au premier plan cour et gardin, eine ferniète côté cour; au mitant eine table servant d’ buréau, sur ceulle table, papier, pleime, inquerrier, timbre, lifes, ein fauteul derrière, kéyaires à droide et à géauche, ein canapé posé orizéontal'mint dins chaque pan copé in laissant passache intre l' canapé et l’ décor, côté cour à l'avant-scène ein guéridéon avec des ustinsiles de méd'cin.
FERNAND, ALBERT
(I's séont assis su’ l' canapé côté cour)
… Et v’là du c' que j'in suis ; elle a eu s’ dipléôme i a quin' jours
et te véos qu'elle n’a pos tardée à ouver s’ cabinet d' consultatiéon.
Si bin qu'asteur.
J'm'in vas sans pus tarder, invéyer m' démissiéon au directeur
de l'administratiéon.
Te n' f'ras pos chà, te dis chà pou rire.
Pos du tout ch'est on n' peux pos pus sérieux: ch’étéot même
cha que j' rédigéos quand t'es rintré, elle s'ra copiée au prope
tantéôt et invéyée d'mo matin.
Cha fét: qu’ te vas démissonner d'une plache qui t' rapporte
dix-huit chints francs et des espérances ?
