This page has been proofread.
90 ........................... VISIONS
- Ch'est du blé, de l' viainn', du pétrole,
- D' sétoff, des légum', du pisson,
- Ch'est du savon, d's épices, d' l'ole
- Ou bin chint espèces d' boisson,
- Ch'est à l' queu' leup-leup d'autt' carettes
- Àveuc de l' pall, d' l'avoin', du foin,
- Sins compter l' nombe d' bicyclettes
- Roulaint grainn' vitesse et sins b'soin.
- Et tout cha file à l' continue
- Pressé de r'partir, d'arriver,
- Si bin qu' parfos ch'est eun' cohue
- A n' pus savoir par u s' mouver.
- A chés extrémités d'la ville
- Aussi caingé' que ch' biau quartier
- Ou d'vaint ch' l'ouvrier sach', trainquille,
- Vivot à l'aise d' sin métier.
- Métier qu'il héritot d' sin père
- Aveu l'queul sins trop s' cravainter
- Y povot rire d' la misère
- Et vir ses infaints n' n'hériter ;
- Dins ch' bout ou ch' tiot propriétaire
- Maingeot ses rintt' toudis contint,
- Ou ch' boutiquier bien à s'n affaire
- Vindot s' marchaindise au comptaint,
- In trouve d's usinn' à l' douzaine
- D'ù l' feumé' du matin au soir
- Sortaint comm' si ch'étot d'eun' veine
- Eurcouf' chés murs d'eun' couche d' noir.
