This page has been proofread.
86 ........................... VISIONS
- DEUXIÈME PARTIE
- Chés s'cond', minutt', heur' et jornées
- Que ch' timps escout d' sin graind ramon,
- Ont fait bin des mos et d's ainnées
- Escouts parels d'puis que ch' démon
- D' rage étot déquindu sur tierre.
- Et, dins l' vill' vu' d' ses méchaints yiux,
- Chés gins d'alors sont à l' cim'tière
- Auprès d' leu fêmm' même d' leu fius.
- Mais ch' cim'tièr' bordé d'eune hayure,
- Rimpli d'épitaphes d' bos blainc,
- D'vaint lesqueull' à g'noux; l' vrai' posture,
- Pour sin mort v'not prier ch' deuillaint,
- Ch' cim'tière avaint si bien au l'ombe
- D' cheull' crox ou Jésus a souffert,
- D'ù s' véyot dins l' tierre à chaq' tombe
- Queuq' pots d' fleurs intourés d' buis vert ;
- A ch't heure s' lomme eun' nécropole
- Où pir' qu'à l' foire in vient r'wêtier
- Des biaux monumints qu' par gloriole
- In fait bâtir comm' pou s' dintier.
- Où, sign' des timps, d' bêtise humaine,
- Vanité de ch' faibe et de ch' fort,
- Pou moutrer que s' fortune est grainne
- Pus souvint qu' pour honorer ch' mort.
