(46)
At quetiog ibpa na selese nang guisan bie nang guerasan at delandelanan sablang atiu carin á pauang macamal mipamulaia la ampon metilijan.
Lalu na inia ping isalita na na ing secaya'nang bote canitang lumbug ya ampon ing sablasablang dusang guemita'na mipatula ya lua ing ibpa nang matua.
Pati Consejeros á carin macarap at ing Reina naman á asaua nang liag pesi tangis la ngan maragu'la sindac qng querarsa'na ning Principeng magcas.
Inia ping aquit na ning budning Monarca ing lua na tinulu niting manuyang na agad yang tinicdo at lepita'na ya pulisan mung lua mu ó ana'cung sinta.
Qñg dagul na tula ning Aring macamal siam pa ping aldo fiesta rang depatan puring pasalamat qñg Dios á malam qng pangaligtas na quetang casaquitan.
Iniang miganap na itang fiesta reales y Pantinople pin cusa yang linapit qñg Aring ibpa na mamun ya ping tiquis carin qñg Antioquia magnasang mibalic.
Aguia mang ing Ari qng lub na masucal at é na sa buri quea yang tulutan é naman maliari yang macasangcan uli na ning tungcul á carelang licuan.
