- (18)
Picullutan da ne ita ning bibiruan.
at mipatiedo ya silla nang luclucan
itang macasilip á tune ping Sultan
canitang tula na é na apiguilan.
Mepilit yang guingeas niting Abu ngana
caretang megulung mangalagung Dama
ibili yu na cu icong parapara
at queco ngang sabla ting cumpit cung sinta.
Binili re queta iting Abu naman
detang mapamirung Damang tampalasan
dapot menasaquit sabla nang catauan
qng dacal á candut á é mu abilang.
Itang maquilaguiung Tala na ning abac
caniti nang Abu linapit yang agad
itang guintung copa tala'ne qng gamat
yang macalaman mayalagang alac.
Ing mesabing alac seria neng dininan
quetang pacatudtud á pulbus ning apian
quea na dinaun saring calambingan
caniti nang Abung carelang bibiruan.
Niti nan mong Abu ininum nang agad
é na inuculan tin samut ing alac
mematucba ne pin buntuc na mebayat
é naman mebalam bigla' yang melacac.
Yana ing paglual na ning tune rang Sultan
ing pamangaili na é na apiguilan
itang biniru ra queang pegumasdan
canita ning sillon macaparalampang.
