- ( 19 )
Bigla yang minaus caretang alagad
ita ning malacac quea yang pepabuat
at ing susulud na layun pepalucas
sadia nang imalan inaliling agad.
At itang Mesrur yang mitunğulan
paniatang ning bengi á binang malalam
qng iting y Abu yuli reng marapal
quetang picuanan dang bale nang tucnangan.
Inia ping mabenġi tiparan dang agad
itang inutus na ning Sultan á matas
at iting salita carin ta ilipat
canitang pinialung matudtud malacac.
Ing tula't ligaya paua ngang dinalan
cabas ning panaun é ta apiguilan
anti mo y Abu queang queralanan
qng panga-guising na panga-cabucasan.
Iniang imulat no ding adua nang mata
pablasa qng silid mararalumdum pa
sadia nang tucnagan é na aquilala
balána ning tau qñg Palacio atiu pa.
Guinulisac ne pin at mamaus Dama
¡Tala na ning abac! nu carin ca ngana
iniang é mequibat miuman minaus ya
qñg lalung sicanan guliac nang minuna.
Macaquera ya mu indu nang ibatan
misdan ya't miguising guliac nang masican
ine ne y Abu at inagad quitnan
itang cucullo na nanu casangcanan.
