- (5)
Ing cacung garrapa queca cu ne lacuan
Artos tangapan me mausta yang siñal
nung uarit lumutu yang macalulau
panintunan mu eu ti'cu qñg cascupan.
Qng miliaring ita lua ding mata na
nining manabilin qñg cuyug na't sinta
ing Principe Artos é na apibata
quea yang pitnube qñg pamipamun da.
Dacal pin mong bandi ampon cayatinan
ing pepabacal na qng cuyug na't irang
deta ning doblones alila pabilang
diamante at perlas batung misnang camal.
Ing queang secayan metung yang cabayu
at metung meman pin ing qñg bastamento
banding darala na é mu mamagcanu
quetang panlacad na magsilbing sustento.
Caras na qñg daung agad yang miglulan
pati na cabayu ampon casangrapan
ting metung á Conde á carina disan.
ing reinong Irlanda ing queang ulian.
Nanuta canitang carelang panlayag
miras la libutad nitang dayat-malat
dinatang ing auĝin baguiung é patanat
ing mesabing daung agad nang misalbag.
Iting Oliveros lub na ning banna
mecacalauat ya qng metung á tabla
cabayu't sustento pauang asaguip da
anga ning miras la qñg dane canğatba.
