GEOGRAFIE Polesia
Esque on vell creder que it existe ancor primitiv populationes in Europa ? Ili habita circum li cité de Pinsk proxim li frontiera oriental de Polonia. Li revùe « La Nature » del 19. nov. 1934 publicat pri ili un grand studie informativ de quel noi cita li secuent passagie :
« In verne li Polesia presenta li aspect de un vast mare long de plu quam 200 km. e larg de 80 km., mare sur quel vola bandas de movettes e savage anates.
Quande in may li aquas retrae se, li morasse aspecte variatmen. Generalmen it es un herbosi planage, semat de juncs e de cannes e extendent se al infinit...
Hodie li caractere del Polesia changea rapidmen, li cultivabil terras es conquestat sur li forest quel on abatte e sur li morasses queles on ex-sicca mersi a canales de exflution. Li guvernament polonés intente exsiccar completmen li morasses de Pinsk. To es un tache gigantesc, nam on va dever conquestar 2 milliones de hectares de fertil terren, tache quel equivale al siccation del Zuidersee per li Nederlandéses.
Li villages del region de Pinsk es situat in li interiore del morasses, in li bord del rivieres, ta u li rive es sat elevat, su insulettes sandosi es tre distant de unaltru. Plu on ea vers ost, plu li land deveni savagi. Ante apen quelc annus, on decovrit litt villages completmen isolat in li morasses e de queles li habitantes, vivent in un statu primitiv, possedet null civil inregistration. In altri villages li indigenes ignorat completmen li guerre de 1914-1918 e ne savet quo es un tren o mem un scaliere.
De u proveni li nomines del quin partes del munde ?
Necos es plu passionant quam serchar li origine de un nómin devenit banal pro que it es pronunciat omni dies.
De u veni, por exemple, li nómin del continentes ? Por li ancian Munde, Europa, Africa e Asia, li serchas es sovente reductet a interpretationes plu o minu hypotetic, a fontes historic e fragmentari. Til hodie on admisset generalmen que li nómin « Europa » hat esset in comensa un grec deformation del parol fenician « ereb » significant « li terra u li sole cucha se ». Ma esque to es cert ? Li erudite Hans Filipp ha just publicat un studie demonstrant il falsitá de ti teorie. Secun il, Europa indicat primitivmen ne un continent quel li Antiquos ignorat presc in tot, ma solmen li territoria situat in li nord de Grecia, plu precismen in li littoral region de Tracia. Mult passagies in li grec literatura parla pri Europos, Oropos, macedonian provincia. Talmen, Herodot parla pri li rey del Persos, « quel vole ducter su armé in
61
