LI MAX GRAND COSES IN LI MUNDE
Li max profund lago jace in Siberia e es nominat Baikal-lago. Su profundore es 1200-1600 m.
Li max grand insul es Grenland. It es un dan colonie e have un superficie de 88.100 quadrat kilometres.
Li max grand tunnel es li Simplon-tunnel in Svissia. It es long de 19.731 metres.
Li max grand scaliere sta in China in li provincie Shantung. It have 6000 gradus e ducte a un temple constructet sur li sant monte Taishan. Su total altore es 1543 m. e on besona 5-6 hores por ascender it. Li ascension es ancor alentat de mult mendicatores quel side del base til li temple e demanda contributiones del numerosi peregrinatores ascendent al sant loc.
Li max long viaduct es tre ancian e es trovat en Choating, China. It es long de 144 kilometres, larg de 1 1/2 metres e ducte tra un ancian morasse, quel nu es siccat.
Li max grand pont suspendet es in Brooklin-New-York. It have un longore de 1850 m. e es tam alt que omni naves, exceptet li « Imperator » posse passer sub li arc alt de 41 metres.
Li max long strada es Unter den Linden (Sub li tilies) in Berlin, Germania. It es larg de 60 metres.
Li max ancian università es ti de Rio de Janairo in Brazil. It es in un golf e vell posser inbrassar omni grand naves in li munde.
Li max strangi animale es li australian Platypus quel fa oves quam un avie, quel have ravissent pelisse e palmat pedes. In li ungules li mascul have venen-glandes quam serpentes in li dentes. Vice musel it have bec quam anat. Li yun platypus es portat in tasca quam li cangurello es portat del cangaru-matre. Ti strangi animale habita in tre rusatmen excavat cavernes.
Li max grand activ vulcan es li Cotopaxi in Ecuador, alt de 5.960 metres.
Li max grand parc es li Yellowstone-park in li Rocky Mountains in U.S.A. It imbrassa un dominia de circum 14.000 quadrat kilometres.
Li max grand libre es certmen in li Britanic museo in London. It contene geografic cartes de Nederland. Li libre, in gigant covrituras, es ligat in cute e richmen ornat per aure. It pesa 362 kilogrammes e es alt de 2,15 metres. It esset donat al rey Karl II in 1660, quande it embarcat se in Holland por ear in London.
Li max alt gratta-ciel de New-York. -- Omnes conosse li gratta-cieles (sky-scraper) de New-York e anc tis de Chicago ; nam in ti cité on comensat in 1881 constructer ti gigantic domes, celebri in li tot munde.
In New-York ho-témpor existe pluri centenes de gratta-cieles queles have de 20 a 80 etages. Li max alt esset constructet in 1930 ; it es li Empire State Building. Il have 86 etages e atinye 380 metres, do it es ye 80 metres plu alt quam li Eiffel-turre.
71
